एजेन्सी – अतिरिक्त समयसम्म लम्बिएको खेलमा अष्ट्रियालाई पराजित गर्दै इटालीले युरोपेली च्याम्पियनसिप २०२० को क्वाटरफाइनलमा स्थान पक्का गरेको छ । निर्धारित ९० मिनेट गोलरहित बराबरीमा सकिएपछि इटालीले वैकल्पिक खेलाडीको दुई गोलमा २-१ को जित दर्ता गरेको हो ।

खेलको सुरुवातदेखि नै इटालीले बल पोसेसनमा पकड जमाएपनि खेलमा अग्रता लिन सकेको थिएन । दोस्रो हाफमा अष्ट्रियाले गोल गरेपनि भीएआरले मान्यता नदिँदा खेल अतिरिक्त समयमा लम्बिएको थियो । इटालीका फरवार्डले अपेक्षित प्रदर्शन गर्न नसक्दा अष्ट्रियाको रक्षात्मक रणनीति सफल भएको थियो ।

१७ औं मिनेटमा निकोलो बारेल्लाको प्रहारलाई गोलरक्षकले खुट्टाले बचाउन सफल रहेका थिए । त्यसको दुई मिनेटपछि नै बारेल्लाको प्रहारलाई डिफेन्डर हिन्टरेगरले छेक्दै गोलको खतरा टारेका थिए । ३२ औं मिनेटमा इटालीको अग्रता लिने प्रयासमा पोस्ट बाधक बन्यो । चिरो इम्मोबिलेले झन्डै २५ यार्ड टाढाबाट गरेको प्रहारले गोलरक्षक ड्यानीएल ब्याकमानलाई बिट गरेपनि पोस्टमा लाग्दै बाहिरिएको थियो ।

पहिलो हाफमा अष्ट्रियाले निकै कम गोलको अवसर पाएको थियो । १८ औं मिनेटमा मार्को अर्नाउटोभिचले पेनाल्टी क्षेत्र बाहिरबाट गरेको भली प्रहार आकासिएको थियो । ३६ औं मिनेटमा डेविड अलाबाको फ्रिकिक क्लियर गरेपछि आएको अवसरलाई इटालीका गोलरक्षक जियानलुइजी डोनारुम्माले सहजै बचाएका थिए । ४२ औं मिनेटमा स्पिनाजोलाको प्रहारलाई गोलरक्षक ब्याकमानले विफल पारे ।

६३ औं मिनेटमा अष्ट्रियाले अर्नाउटोभिचको हेडर गोल भएपनि भीएआरले त्यसलाई मान्यता दिएन । लाइनरको क्रसलाई अलाबाले हेडर गरेपछि फार पोस्टमा अर्नाउटोभिचले पोस्टको दिशा दिएका थिए । तर भिडिओ असिस्टेन्ट रेफ्रीले अर्नाउटोभिचको अन्तिम टचलाई अफसाइड भन्दै गोल दिएनन् ।

८२ औं मिनेटमा स्पिनाजोलाको क्रसमा बेरार्डीको एक्रोब्याटिक प्रहार निकै बाहिर गयो । पेनाल्टी क्षेत्रभित्र अनमार्क रहेको अवस्थामा उनले केहि संयम भएर बल नियन्त्रण गर्नुपर्नेमा हतारमा प्रहार गर्दा गोलरक्षकलाई कुनै समस्या दिन सकेनन् ।

अतिरिक्त समयको ९५ औं मिनेटमा वैकल्पिक खेलाडीका रुपमा मैदान प्रवेश गरेका फेडेरिको किएजाले गोल गर्दै इटालीलाई अग्रता दिलाए । युभेन्टसका फरवार्ड किएजाले स्पिनाजोलाको चिप पासमा ६ यार्ड बक्स क्षेत्रभित्र राम्रो बल नियन्त्रण गर्दै तेस्रो टचमा गोल गरेका थिए ।

लोरेन्जो इन्सिग्नेले १ सय ४ औं मिनेटमा प्रहार गरेको फ्रिकिकलाई ब्याकमानले उत्कृष्ट डाइभ दिँदै विफल पारेका थिए । तर त्यस बचाउपछि आएको कर्नरबाट बनेको मुभमा इटाली अग्रता दोब्बर पार्न सफल रहयो । म्याटियो पेस्सिनाले पेनाल्टी क्षेत्रभित्र डिफेन्सले क्लियर गर्न नसकेको बललाई गोलमा परिणत गरेका थिए ।

अतिरिक्त समयको १ सय ६ औं मिनेटमा डोनारुम्माले राम्रो बचाउ गर्दै इटालीको २ गोलको अग्रता जोगाए । उनले लुइस स्वाउबले पेनाल्टी क्षेत्र बाहिरबाट गरेको शक्तिशाली प्रहारलाई आफ्नो बायाँतर्फ डाइभ दिँदै बचाएका थिए ।

खेलको ५ मिनेट समय बाँकी रहँदा अष्ट्रियाले गोल फर्काउँदै खेलमा फर्कने संकेत दियो । स्वाउबको कर्नरमा वैकल्पिक फरवार्ड सासा कालाज्डिचले गोल गर्दै इटालीलाई दबाबमा राखेका थिए । उनले कर्नरमा आएको बललाई निअर पोस्टमा डाइभिङ हेडर गर्दै गोल गरेका थिए । यससँगै इटालीले लगातार ११ खेलमा गोल नखाएको सिलसिलामा पनि पुर्णविराम लागेको छ ।

इटालीले अब क्वाटरफाइनलमा आइतबार हुने बेल्जियम र पोर्चुगलबीच खेलको विजेतासँग खेल्नेछ । उक्त क्वाटरफाइनल खेल २ जुलाईमा म्युनिखमा हुनेछ ।

अष्ट्रियालाई हराउँदै इटालीले नयाँ राष्ट्रिय कीर्तिमान समेत कायम गरेको छ । लगातार ३१ खेल अपराजित रहँदै इटालीले ८२ वर्ष पुरानो कीर्तिमान तोडेको हो । यसअघि इटालीले सन् १९३५ अक्टोबर देखि सन् १९३९ जुलाईसम्म ३० खेल अपराजित रहने कीर्तिमान राखेको थियो । त्यसबेला टोलीका प्रशिक्षक भिटोरियो पोज्जो थिए । उनको नेतृत्वमा टोलीले लगातार दोस्रो विश्वकप तथा सन् १९३६ को ओलम्पिकमा स्वर्णपदक समेत जितेको थियो ।

इटालीले सन् २०१८ मा रोबर्टो मान्सिनीलाई प्रशिक्षकको जिम्मेवारी दिएपछि जम्मा २ खेल हारेको छ । पछिल्लोपटक टोलीले सन् २०१८ को नेसन्स लिगको खेलमा पोर्चुगलसँग पराजय बेहोरेको थियो । त्यसयता टोलीले ३१ खेलमा हार बेहोरेको छैन । पछिल्लो १२ खेलमा टोलीले ३४ गोल गरेको छ ।

त्यसअघि शनिबार नै भएको पहिलो खेलमा डेनमार्कले फरवार्ड कास्पर डोलबर्गको दुई गोलमा वेल्सलाई पराजित गरेको थियो । डेनमार्क ४-० को फराकिलो जित दर्ता गर्दै क्वाटरफाइनलमा प्रवेश गर्न सफल भयो ।

खेलको आठौं मिनेटमा नै डेनिस फरवार्ड डोलबर्गले पेनाल्टी क्षेत्र बाहिरबाट गरेको प्रहार आकासिएको थियो । लगत्तै अर्कोतर्फ कप्तान ग्यारेथ बेलको प्रहार थोरैले बाहिरिंदा वेल्सले अग्रता लिन सकेन । डेनमार्कले त्यसपछि आक्रमणमा जोड दिँदै लगातार कर्नरबाट दबाब सिर्जना गरेपनि गोल गर्न भने सकेन ।

२७ औं मिनेटमा डोलबर्गले गोल गर्दै डेनमार्कलाई सुरुवाती अग्रता दिलाए । पेनाल्टी क्षेत्र बाहिरबाट उनले गरेको प्रहारलाई गोलरक्षक ड्यानी वार्डले डाइभ दिएपनि जोगाउन सकेनन् । विंगर मिकेल डाम्सगार्डले दिएको पासलाई फ्रान्सेली क्लब निसबाट खेल्दै आएका फरवार्डले सुन्दर गोलमा परिणत गरे ।

डच क्लब आयाक्सका लागि समेत खेलेका उनले आफ्नो पूर्व क्लबको मैदानमा नै गोल गर्न सफल भएका हुन् । उनी नियमित फरवार्ड युसुफ पाउल्सेनलाई चोट लागेपछि सुरुवाती रोजाइमा परेका थिए । ३२ औं मिनेटमा डोलबर्गकै प्रहारलाई गोलरक्षक वार्डले विफल पार्दै स्कोर १-० कै स्थितिमा राखे ।

इन्ज्युरी समयमा डेनमार्कले अग्रता दोब्बर गर्ने अवसर सदुपयोग गर्न सकेन । फरवार्ड मार्टिन ब्रेथवेटले पेनाल्टी क्षेत्रभित्र बल रोक्न नसक्दा पछाडी आएका डिफेन्डर योकिम माहेलले गरेको प्रहार गोलरक्षक वार्डले विफल पारे ।

दोस्रो हाफको सुरुवातमा नै डोलबर्गले डेनमार्कको अग्रता दोब्बर पारे । ४८ औं मिनेटमा ब्रेथवेटले पेनाल्टी क्षेत्रको दायाँ भागबाट दिएको लो क्रसमा नेको विलियम्सले खराब क्लिअरेन्स सिधै डोलबर्गको खुट्टामा पुगेको थियो । उनले ६ यार्ड बक्सबाट सहजै गोलरक्षक वार्डलाई बिट गर्दै व्यक्तिगत दोस्रो गोल गरे ।

८२ औं मिनेटमा डेनमार्कले गोल गर्ने अर्को अवसर सिर्जना गर्यो । वैकल्पिक फरवार्ड आन्द्रिएस कर्नेलिएसले मिडफिल्डबाट बढाएको मुभमा ब्रेथवेटले दिएको क्रसलाई माहेलले गोलको दिशा दिन सकेनन् ।

८६ औं मिनेटमा ब्रेथवेटले सुवर्ण अवसर खेर फाले । कर्नेलिएसको हेडर गोलरक्षक वार्डले बचाएपछि आएको बललाई ब्रेथवेटले खाली पोस्टमा गोलको दिशा दिन सकेनन् । उनको प्रयास पोस्टमा लागेर फर्केपछि आएको रिबाउन्डमा जोआकिम एन्डरसनको प्रहार बाहिरियो ।

८७ औं मिनेटमा माहेलले गोल गर्दै डेनमार्कको जित सुनिश्चित गरे । वैकल्पिक खेलाडी माथिअस जेन्सनले दिएको सुन्दर पासलाई माहेलले पेनाल्टी क्षेत्रभित्र नियन्त्रणमा लिँदै गरेको शक्तिशाली प्रहार गोल भएको थियो ।

९० औं मिनेटमा वेल्स १० खेलाडीमा सिमित भयो । माहेलमाथि खराब ट्याकल गरेपछि रेफ्रीले उनलाई सिधै रातो कार्ड देखाएका थिए । वेल्सका लागि इथान अम्पादुले पनि अघिल्लो खेलमा सिधै रातो कार्ड पाएका थिए ।

इन्ज्युरी समयमा ब्रेथवेटले गोल गर्दै डेनमार्कको फराकिलो जित पक्का गरे । उनले पेनाल्टी क्षेत्रभित्र संयमित रहेर फिनिस गर्दै वार्डलाई बिट गरेका थिए । रेफ्रीले सुरुवातमा अफसाइड दिएपनि भीएआर रिभ्युबाट गोलले मान्यता पाएको थियो ।

डेनमार्कले अब क्वाटरफाइनलमा आइतबार ९:४५ बजे हुने चेक रिपब्लिक र नेदरल्यान्ड्सको विजेतासँग खेल्नेछ ।