एजेन्सी – युरो २०२० अन्तर्गत राउन्ड अफ १६ को इंग्ल्यान्ड र जर्मनीबीच जारी खेलको पहिलो हाफ गोलरहित बराबरीमा सकिएको छ । दुवै टोलीले गोलको अवसर सदुपयोग गर्न नसक्दा प्रतिस्पर्धात्मक खेल बराबरीमा नै सिमित रहयो ।

१६ औं मिनेटमा कप्तान म्यानुएल नोएरले सुन्दर बचाउ गर्दै खेल गोलरहित नै राखे । रहिम स्टर्लिङले पेनाल्टी क्षेत्र बाहिरबाट गरेको प्रहारलाई नोएरले आफ्नो बायाँतर्फ डाइभ दिँदै विफल पारेका थिए ।

२७ औं मिनेटमा ह्यारी मगाएरको हेडरले पोस्टको दिशा लिन नसक्दा इंग्ल्यान्ड अग्रता लिनबाट चुक्यो । ट्रीपिएरको क्रसमा मगाएरले फितलो हेडर गरेपछि जर्मनी खेल बराबरी राख्न सफल भएको थियो । त्यसअघि १७ औं मिनेटमा पनि उनको हेडर सिधै गोलरक्षक नोएरको हातमा पुगेको थियो ।

खेलको ३२ औं मिनेटमा गोलरक्षक जोर्डन पिकफर्डले उत्कृष्ट बचाउ गर्दै खेल बराबरीमा राखे । काइ हाभर्ट्जको पासमा टिमो वेर्नरले वन भर्सेस वनको स्थितिमा पेनाल्टी क्षेत्र भित्रबाट गरेको प्रहारलाई पिकफर्डले विफल पारेका थिए ।

इन्ज्युरी समयमा इंग्ल्यान्डका कप्तान ह्यारी केनले अग्रता लिने अवसर सदुपयोग गर्न सकेनन् । स्टर्लिङले अघि बढाएको आक्रमणमा डिफेन्डरको ट्याकल पेनाल्टी क्षेत्रभित्र अनमार्क रहेका केनकै पथमा आएपनि उनले पहिलो टच नै खराब गरेपछि जर्मन डिफेन्सले बल क्लियर गर्ने अवसर पाएको थियो ।

इंग्ल्यान्डले पछिल्लो खेलमा उच्च प्रदर्शन गरेका ज्याक ग्रिलिसलाई बेन्चमा राख्दै काइरन ट्रीपिएरलाई पहिलो रोजाइमा खेलाएको छ । प्रशिक्षक ग्यारेथ साउथगेटले आफ्नो रणनीति परिवर्तन गर्ने क्रममा विंगर ग्रिलिसको स्थानमा विंगब्याक ट्रीपीएरलाई टोलीमा समेटेका हुन् । यससँगै इंग्ल्यान्डले ३ खेलाडीलाई सेन्टर ब्याकको भूमिकामा प्रयोग गर्ने देखिन्छ ।

यता जर्मनीले भने चोटका कारण फिट नरहेका मिडफिल्डर इल्काए गुन्डोगनको स्थानमा लिओन गोरेट्जकालाई उतारेको छ । कमजोर प्रदर्शन गरेका फरवार्ड सर्ज गनाब्रीको स्थानमा वेरनर सुरुवाती रोजाइमा रहेका छन् । जर्मनीले आफ्नो नियमित ३-४-२-१ रणनीतिमा नै खेल्दैछ ।

इंग्ल्यान्ड सुरुवाती ११ : (३-४-३)

जोर्डन पिकफर्ड (गोलरक्षक) : काइल वाल्कर, ह्यारी मगाएर, जोन स्टोन्स : काइरान ट्रीपिएर, काल्भिन फिलिप्स, डेक्लन राइस, लुक शा : बुकायो साका, ह्यारी केन, रहिम स्टर्लिङ

जर्मनी सुरुवाती ११ : (३-४-२-१)

म्यानुएल नोएर (गोलरक्षक) : माथिअस जिन्टर, म्याट्स हमल्स, एन्टोनियो रुडीगर : रोबिन गोसेन्स, टोनी क्रुस, लिओन गोरेट्जका, जोशुवा किम्मिख : थोमस मुलर, काइ हाभर्ट्ज : टिमो वेर्नर

यस खेलमा जित हासिल गर्ने टोलीले क्वाटरफाइनलमा युक्रेन र स्वीडेनको विजेतासँग खेल्नेछ । त्यस्तै फाइनल यात्राका लागि सेमिफाइनलमा पनि चेक रिपब्लिक र डेनमार्कको विजेतासँग खेल्नुपर्ने छ । त्यसैले पनि यस खेलमा जित हासिल गर्ने टोलीका लागि फाइनल यात्रा केहि सहज हुने देखिन्छ ।