एजेन्सी – नेदरल्यान्ड्सका प्रशिक्षक फ्रान्क डे बोएरले युरोपेली च्याम्पियनसिप २०२० मा अपेक्षित नतिजा निकाल्न नसकेपछि जिम्मेवारी त्यागेका छन् । नेदरल्यान्ड्स फुटबल महासंघले विज्ञप्ति जारी गर्दै दुवै पक्षको सहमतिमा डे बोएर जिम्मेवारी मुक्त भएको जनाएको छ ।

नेदरल्यान्ड्सले राउन्ड अफ १६ मा चेक रिपब्लिकसँग २-० को हार बेहोरेपछि प्रतियोगिताबाट बाहिरिएको थियो । ५१ वर्षीय प्रशिक्षकले गत सेप्टेम्बरमा मात्र जिम्मेवारी सम्हालेपनि सम्झौता अनुसार नतिजा दिन नसक्दा जिम्मेवारी छोड्ने न्रिने लिएका हुन् । समूह चरणका तीनै खेल जित्दै नकआउट चरणमा पुगेको नेदरल्यान्ड्सले चेकविरुद्ध भने दोस्रो हाफमा १० खेलाडीमा सिमित भएपछि खेल गुमाएको थियो ।

महासंघले जारी गरेको विज्ञप्तिमा भनिएको छ, ‘दुवै पक्षको सहमति अनुसार प्रशिक्षक आफ्नो जिम्मेवारीबाट अलग हुँदैछन् । उनले आफैं प्रशिक्षक पदमा कायम नरहने जानकारी दिएका हुन् । सम्झौतामा उल्लेख गरेअनुसार नेदरल्यान्ड्सले युरोपेली च्याम्पियनसिपमा क्वाटरफाइनलसम्म पुग्नुपर्ने थियो । त्यसैले पनि उनको सम्झौता नवीकरण नहुने भएको हो ।’

डे बोएर आफैंले पनि लक्ष्य प्राप्त नहुँदा जिम्मेवारीबाट अलग्गिएको बताए । ‘आफ्नो प्रदर्शनलाई मध्यनजर गर्दै मैले प्रशिक्षक पदमा निरन्तरता नदिने निर्णय लिएको छु । मलाई दिइएको लक्ष्य पनि प्राप्त हुन सकेन । जब मलाई यो पदको लागि प्रस्ताव आयो, मैले गौरव र चुनौतीको रुपमा लिएको थिएँ ।’

‘मैले जिम्मेवारी लिँदा यससँगै आउने दबाबको बारेमा पनि सोचेको थिएँ । अहिले त्यो दबाब बढ्दै गएको छ । यो मेरो लागि राम्रो स्थिति होइन । टोलीका लागि पनि यो अवस्था सुखद छैन । त्यसैले विश्वकप छनोटको महत्त्वपूर्ण खेल आउँदै गरेको अवस्थामा मैले टाढा हुने निर्णय लिएँ ।’