एजेन्सी – युरोपेली च्याम्पियनसिप २०२० अन्तर्गत बेल्जियमविरुद्ध क्वाटरफाइनलमा घाइते भएपछि मैदान छाडेका इटालीका डिफेन्डर लियोनार्दो स्पिनाजोलालाई लागेको चोट गम्भीर रहेको छ । इटालीले २-१ ले खेल जित्दै सेमिफाइनलमा प्रवेश गर्दा स्पिनाजोला भने लामो समय मैदानबाहिर रहने भएका छन् ।

खेलको १५ मिनेट समय बाँकी हुँदा बललाई पछ्याउने क्रममा चोट लागेपछि उनले तुरुन्त आफूलाई परिवर्तन गर्न भनेका थिए । निकै दुखाइ महसुस भएपछि मेडिकल टिम मैदानमा नै आएको थियो । उनलाई स्ट्रेचरमा राखेर मैदानबाहिर लागिएको थियो । मेडिकल टिम आउने बितिकै आफ्नो चोटबारे भेउ पाएका उनी निकै रोएका थिए । उनको स्थानमा एमर्सनले बाँकी समय खेलेका थिए ।

प्रारम्भिक परिक्षणका अनुसार उनको एकिलिसको टेन्डनमा चोट लागेको छ । यो चोट फुटबलमा निकै गम्भीर मानिन्छ । पुर्ण रुपमा ठिक हुन स्पिनाजोलालाई ४ देखि ६ महिना लाग्ने आंकलन गरिएको छ । उनले युरो २०२० मात्र नभएर अर्को सिजनको सुरुवाती केहि महिना विश्राम गर्नुपर्ने भएको छ । २८ वर्षीय डिफेन्डर एएस रोमाबाट खेल्दै आएका छन् ।

स्पिनाजोलाले युरोमा गरेको उच्च प्रदर्शनले युरोपका ठूला क्लबले पनि उनलाई पछ्याएको इटालीका संचारमाध्यमले जनाएका थिए । रियल म्याड्रिड, बार्सिलोना र चेल्सीले उनलाई चासोका साथ हेरेको बताइएको थियो । तर उनी चोटका कारण लामो समय बाहिर रहने भएपछि ट्रान्सफर बजार उनको लागि बन्द भएको छ ।

स्पिनाजोलाले इटालीका लागि ५ मध्य ४ खेलमा सुरुवात गरेका थिए । बायाँ विंगब्याकको रुपमा खेल्ने उनले आक्रमण र डिफेन्स दुवैमा आफ्नो प्रभाव जमाएका छन् । सन् २०१९ मा युभेन्टसबाट रोमा पुगेयता उनले ७१ खेल खेलिसकेका छन् । अर्को सिजन भने उनले नवनियुक्त प्रशिक्षक जोसे मोउरिन्होसँग खेल्न केहि प्रतीक्षा गर्नुपर्ने भएको छ ।