एजेन्सी – युरोपेली च्याम्पियनसिप अन्तर्गत क्वाटरफाइनल चरणको खेल समाप्त भएपछि अब प्रतियोगितामा मात्र ३ खेल बाँकी छन् । दुई सेमिफाइनल र फाइनल खेल बाँकी रहेको अवस्थामा सर्वाधिक गोलकर्ता बन्दै गोल्डेन बुटको होड पनि रोमान्चक बन्दै गएको छ ।

प्रतियोगितामा हालसम्म ४८ खेलमा १ सय ३५ गोल भएको छ । प्रति खेल औसत २.८१ गोल हुँदा पोर्चुगलका कप्तान क्रिस्टियानो रोनाल्डो र चेक रिपब्लिकका फरवार्ड प्याट्रिक सिकले समान ५-५ गोल गरेका छन् । दुवै खेलाडीले प्रतियोगितामा अन्तिम खेल खेलिसकेका छन् ।

समान गोल गरेको अवस्थामा असिस्ट संख्याले सर्वाधिक गोलकर्ताको छिनोफानो हुनेछ । यसमा रोनाल्डोले एक असिस्ट दिँदा सिकको नाममा कुनै असिस्ट छैन । त्यसैले रोनाल्डो नै अहिले दौडमा अघि छन् । त्यस्तै ४ गोल गरेका बेल्जियमका रोमेलु लुकाकु, फ्रान्सका करीम बेन्जेमा र स्वीडेनका एमिल फोर्सबर्गको टोली पनि प्रतियोगिताबाट बिदा भइसकेको छ ।

यस्तो अवस्थामा तीन गोल गरेका इंग्ल्यान्डका ह्यारी केन र रहिम स्टर्लिङसँगै डेनमार्कका कास्पर डोलबर्ग गोल्डेन बुटका दौडमा छन् । सेमिफाइनलमा यी दुई टोलीले एक अर्काको सामना गर्ने हुँदा अबको दुई खेलमा यी खेलाडीलाई आफ्नो गोलसंख्या बढाउने अवसर रहनेछ । उपाधि दावेदार मानिएको इंग्ल्यान्डका दुई स्टारले यसमा दाबेदारी प्रस्तुत गर्नेछन् । ३ गोल गर्नेमा नेदरल्यान्ड्सका जिओर्जिनिओ वाइनाल्डम, पोल्याण्डका रोबर्ट लेवान्डोस्की, स्विट्जरल्यान्डका हरिस सेफेरोभिच र जेर्दान शकिरी छन् ।

प्रतियोगितामा अर्को सेमिफाइनल खेल्ने इटाली ४ र स्पेनका ३ खेलाडीले २-२ गोल गरेका छन् । इटालीबाट चिरो इम्मोबिले, लोरेन्जो इन्सिगने, म्यानुएल लोकाटेली र म्याटियो पेसिना तथा स्पेनका अल्भारो मोराटा, पाब्लो सराबिया र फेरान टोरेसले २-२ गोल गरेका छन् । डेनमार्कका जोकिम माहेल र युसुफ पाउल्सेनको नाममा पनि २-२ गोल रहेको छ ।

यसपटक आत्मघाती गोलको संख्याले पनि युरोमा कीर्तिमान बनायो । क्वाटरफाइनल चरणसम्म आइपुग्दा १० आत्मघाती गोल भएका छन् । प्रतियोगिताको उद्घाटन खेलमा टर्कीका मरिह डेमिरालले इटालीविरुद्ध गरेको आत्मघाती गोल क्वाटरफाइनलमा स्विट्जरल्यान्डका डेनिस जाकारियाले स्पेनविरुद्ध सम्म दशौं गोल भएको थियो ।

यो पनि: कोपा अमेरिका : मेस्सी गोल र असिस्टको अग्रस्थानमा