एजेन्सी – युरोपेली च्याम्पियनसिप २०२० को पहिलो सेमिफाइनलमा उपाधिका दुई दावेदार टोली इटाली र स्पेनबीच मंगलबार राती प्रतिस्पर्धा हुँदैछ । खेल वेम्वली स्टेडियम लन्डनमा नेपाली समयअनुसार राति १२:४५ बजे हुनेछ । दोस्रो सेमिफाइनलमा बुधबार राति इंग्ल्यान्डले डेनमार्कको सामना गर्नेछ ।

इटाली र स्पेनबीचको सेमिफाइनल खेललाई २०१२ को फाइनलको रिप्लेको रुपमा हेरिएको छ । उक्त फाइनलमा स्पेनले ४–० को सानदार जित रचेको थियो । उक्त खेलमा डेभिड सिल्भा, जोर्डी अल्वा, फर्नान्डो टोरेस र हुआन माटाले गोल गरेका थिए । उक्त खेलबाट अहिले स्पेनको टोलीमा सर्जियो बुस्केट्स र जोर्डी अल्बामात्रै रहेका छन् ।

पछिल्लो ३२ खेलसम्म अपराजित रहेको इटाली अर्काे बलियो टोली स्पेनको चुनौती पन्छाउदै सन् २०१२ को फाइनलमा भोगेको हारको बदला लिदै ९ वर्षपछि युरोकपको फाइनलमा पुग्ने दाउमा हुनेछ । इटाली सन् २०१२ मा फाइनलमा स्पेनसँग पराजित हुदै उपाधिबाट विमुख बनेको थियो ।

उत्कृष्ट लयमा रहेको इटालीसँग लोरेन्जो इन्सिग्ने, सिरो इमोविले, फेडरिको चिइसा, निकोलो बरेल्ला, मार्काे भेराट्टी, जर्गिन्हो, इमर्सन, जर्जियो चिलियानी, लियोनार्दाे बोनुची, जियोभानी डि लोरेन्जो र गोलरक्षक जियानलुइजी डोन्नररुम्मा रहेका छन् । यसबाहेक टोलीसँग जियाकोमो रास्पाडोरी, डोमिनिको बेरारडी, माटियो पेस्सिना, फेडरिको बर्नरडेस्ची, एलेसान्द्रो फ्लोरेन्जी र एलेसान्द्रो बास्टोनी टोलीमा रहेका छन् ।

इटालीका दुई डिफेन्डर जर्जियो चिलियानी र लियोनार्दाे बोनुचीको काम युभेन्टसका आफ्नै सहकर्मी अल्भारो मोराटालाई रोक्ने हुनेछ । यि तीन खेलाडी एक अर्कामा जानकार रहँदा सबैलाई खेलमा सहज असहज दुवै हुन सक्नेछ । यि दुईले बेल्जियमका सेन्टर फरवार्ड रोमेलु लुकाकुलाई कुनै पनि समय खुलेर खेल्न दिएका थिएनन् । टोलीले लिओनार्डो स्पिनाजोलाको कमी भने महसुस गर्नेछ ।

यता, युरोकपको सुरुवाती दुई खेलमा गोल गर्न नसकेको आलोचना खेपेको र त्यसपछि लगतार दुई खेलमा ५-५ गोल गर्दै सेमिफाइनलसम्मको यात्रा तय गरेको स्पेन उत्कृष्ट लयमा रहेको इटालीलाई हराउँदै सन् २०१२ पछि फाइनल पुग्ने दाउमा हुनेछ । स्पेनले २०१२ मा इटालीलाई हराउँदै तेस्रोपटक युरो च्याम्पियन बनेको थियो ।

स्पेन २०१२ कै फाइनल खेल दोहोर्याउने लक्ष्यमा रहँदा इटाली उक्त हारको बदला लिने लक्ष्यमा मैदान उत्रनेछ । त्यसपछि यि दुई टोलीको ६ भेटमा स्पेन ४ खेलमा विजयी हुदा एक खेल इटालीले आफ्नो पक्षमा पारेको छ । एक खेल बराबरीमा सकिएको छ । पछिल्लोपटक यि दुई टोलीले सन् २०१७ मा विश्वकप छनोटमा प्रतिस्पर्धा गर्द स्पेनले ३–० को जित निकालेको थियो ।

स्पेनसँग जारी युरोमा दुई गरिसकेका अल्भारो मोराटा, फेरान टोरेस, पाब्लो सारावियासँगै ड्यानियल ओल्मो, पेड्री, सर्जियो बुस्क्वेट्स, कोकी, जोर्डी अल्वा, पाउ टोरेस, एमेरिक लापोर्टा, सेसर एज्पिलिक्वेटा र क्वाटरफाइनलमा पेनाल्टी सुटआउटमा नायक बनेका गोलरक्षक उनाई सिमोन रहेका छन् । यस्तै टोलीसँग मिकेल ओयरजावाल, जेरार्ड मोरेनो, एडमा ट्राओरे, रोड्री, मार्काेस लोरेन्टे, थियागो अलकान्तरा, एरिक गार्सिया र डिएगो लोरेन्टे जस्ता खेलाडीको साथ रहेको छ ।

समग्र हेड टु हेडमा स्पेन केही अघि देखिएको छ । यि दुई टोलीले हालसम्म ३३ खेलमा प्रतिस्पर्धा गर्दा स्पेन १२ खेलमा विजयी भएको छ । इटालीले ९ खेल आफ्नो पक्षमा पार्दा १२ खेल बराबरीमा सकिएको छ । सन् २०१६ को प्रि–क्वाटरफाइनलमा २–० ले पराजित भएयता स्पेनले पछिल्लो दुई खेलमा इटालीसँग हार बेहोरेको छैन । जसमा एक जित र बराबरीको नतिजा छ ।