एजेन्सी – युरोपेली च्याम्पियनसिप २०२० को फाइनलमा स्थान बनाउनका लागि मंगलबार हुने पहिलो सेमिफाइनलमा स्पेन र इटाली भिड्दैछन् । खेलअघि दुवै टोलीका प्रशिक्षकले आ-आफ्नो भनाइ यसरि राखेका छन् ।

इटालीका प्रशिक्षक रोबर्टो मान्सिनी :

स्पेन बेल्जियमभन्दा फरक भएपनि खेल कठिन हुनेछ । अघिल्लो खेलको तुलनामा यो फरक किसिमको हुनेछ । हामीले थप चुनौतीको सामना गर्नुपर्छ । स्पेनले राम्रो फुबक खेल्दै आइरहेको छ । अहिले केहि युवा खेलाडी छन् र केहि परिवर्तन पनि भएको छ । स्पेनसँग राम्रो प्रशिक्षक छन् र धेरै राम्रा खेलाडी पनि ।

स्पेनका प्रशिक्षक लुइस एन्रिके :

मलाई लाग्दैन हामीमध्य कुनै टोलीले एकपक्षीय प्रदर्शन गर्नेछ, त्यसैले खेललाई लिएर उत्सुकता छ । उच्च कोटिका खेलाडी मात्र नभएर इटाली सामुहिक रुपमा पनि राम्रो छ । आक्रमण र डिफेन्समा नै एकतृत भएर खेल्छ । हाम्रो पनि उस्तै शैली छ । उनीहरु लगातार विपक्षीलाई दबाब दिन्छन्, जुन विगतको इटाली टोलीमा कमै देखिन्थ्यो । दुवै टोलीले आ-आफ्नो अवसर पाउनेछन् ।

स्पेनले पछिल्लो खेलमा मिडफिल्डर पाब्लो सराबियालाई मांशपेसीको चोटका कारण पूरा समय प्रयोग गर्न सकेको थिएन । आजको खेलमा उनले पहिलो रोजाइमा खेल्नेबारे शंका रहेको छ । त्यसअघि दुवै खेलमा निर्णायक प्रदर्शन गरेका सराबियाले खेल्न नसकेको अवस्थामा ड्यानी ओल्मोले पहिलो रोजाइमा खेल्ने सम्भावना रहेको छ ।

आक्रमणमा प्रशिक्षक लुइस एन्रिकेले अल्भारो मोराटालाई नै निरन्तरता दिने देखिन्छ । क्लब स्तरमा इटालीका मुख्य डिफेन्डर जिओर्जियो किएलिनी र लिओनार्दो बोनुचीसँग खेल्दै आएकाले पनि एन्रिके यसको फाइदा उठाउन चाहन्छन् । डिफेन्स र मिडफिल्डमा कुनै परिवर्तन हुने देखिन्न । फेरान टोरेसले पनि सुरुवात गर्ने सम्भावना कम छ ।

यता इटालीका लागि लेफ्ट ब्याक लिओनार्डो स्पिनाजोलाको चोटले ठूलो धक्का पुगेको छ । प्रतियोगिताकै उत्कृष्ट खेलाडीमध्यमा रहेका उनले बेल्जियमविरुद्ध खेलमा गम्भीर चोट बोकेका थिए । इटाली पुगेर शल्यक्रिया गरिसकेका उनले ६ महिना विश्राम लिनुपर्ने भएको छ । उनको स्थानमा एमर्सनले खेल्ने पक्काजस्तो देखिन्छ ।

मिडफिल्डमा इटालीले मार्को भेराट्टी, निको बरेल्ला र जोर्जिन्होलाई नै निरन्तरता दिने देखिन्छ । म्यानुएल लोकाटेलीले प्रतियोगितामा बलियो सुरुवात गरेपनि चोटबाट मुक्त भएपछि भेराट्टीले सानदार प्रदर्शन गरेका छन् । फेडेरिको किएजाले पनि डोमेनिको बेरार्डीभन्दा अघि रहेर खेल्ने देखिन्छ ।

सम्भावित ११ :

स्पेन : (४-३-३)

उनाइ सिमोन : सेजार एज्पिलीक्वेटा, एरिक गार्सिया, एमेरिक लापोर्ट, जोर्डी अल्बा : कोके, सर्जियो बुस्केट्स, पेड्री : जेरार्ड मोरेनो, अल्भारो मोराटा, ड्यानी ओल्मो

इटाली : (४-३-३)

जियानलुइजी डोनारुम्मा : डी लोरेन्जो, लिओनार्दो बोनुची, जिओर्जियो किएलिनी, एमर्सन : निको बरेल्ला, जोर्जिन्हो, मार्को भेराट्टी : फेडेरिको किएजा, चिरो इम्मोबिले, लोरेन्जो इन्सिग्ने