एजेन्सी – युरोपेली च्याम्पियनसिप २०२० अन्तर्गत दोस्रो सेमिफाइनलको पूर्वसन्ध्यामा डेनमार्कका पूर्व प्रशिक्षक आगे हरेइदेले इंग्लिस टोलीका कप्तान ह्यारी केनको प्रशंसा गरेका छन् ।

हरेइदेका अनुसार केन क्रिस्टियानो रोनाल्डो जतिकै खतरनाक रहेको र सेमिफाइनलमा केन नै निर्णायक बन्नसक्ने बताए । ‘केन क्रिस्टियानो रोनाल्डो जतिकै छन्,’ उनले भने, ‘ उनले अवसर पाए भने गोल गर्न सक्छन् । त्यसैले उनी खतरनाक छन् ।’

हरेइदेकै नेतृत्वमा डेनमार्कले युरो २०२० मा स्थान पक्का गरेको थियो । तर कोरोनाका कारण प्रतियोगिता एक वर्ष स्थगित भएपछि कास्पर हुल्मन्दले टोलीको नेतृत्व सम्हालेका थिए ।

केनले प्रतियोगिताको समूह चरणको तीनै खेलमा गोल गर्न नसक्दा उनको प्रदर्शनलाई लिएर प्रश्न उठेको थियो । तर त्यसयता जर्मनीविरुद्ध एक र युक्रेनविरुद्ध दुई गोल गर्दै उनले आफ्नो स्तर सिद्ध गरेका छन् ।

हरेइदेका अनुसार केनलाई कुनै पनि समय खेलबाट बाहिर राख्न सकिन्न । ‘केन आक्रमणमा यताउति गरिरहेको देखिन्छ । लाग्छ उनी खेलमा छैनन् । तर जब स्टर्लिङ, सान्चो वा ग्रिलिसले एक्कासी पास दिन्छन्, केन गोल गर्नका लागि त्यहाँ उपलब्ध हुन्छन्,’ उनले भने ।

हरेइदेले डेनमार्कको बलियो पक्ष टिम स्पिरिट रहेको र खेल इंग्ल्यान्डका लागि सहज नहुने पनि बताए । उनले डेनमार्कको डिफेन्सको प्रशंसा गर्दै इंग्ल्यान्डविरुद्ध पनि राम्रो प्रदर्शनको आशा राखेको बताए ।