एजेन्सी – युरोपेली च्याम्पियनसिप २०२० अन्तर्गत डेनमार्कविरुद्ध हुने दोस्रो सेमिफाइनलका लागि इंग्ल्यान्डका प्रशिक्षक ग्यारेथ साउथगेटले सुरुवाती रोजाइमा एक परिवर्तन गरेका छन् ।

युक्रेनविरुद्ध ४-० को जित हासिल गरेको टोलीबाट साउथगेटले जेडन सान्चोको स्थानमा बुकायो साकालाई पहिलो रोजाइमा खेलाएका हुन् । साकाले पछिल्लो खेलमा चोटका कारण विश्राम लिनुपरेको थियो । उनले आक्रमणमा ह्यारी केन र रहिम स्टर्लिङलाई साथ दिनेछन् । मेसन माउन्ट, काल्भिन फिलिप्स र डेक्लन राइस पनि इंग्ल्यान्डको मिडफिल्डमा छन् ।

इंग्ल्यान्डले प्रतियोगितामा हालसम्म कुनै गोल खाएको छैन । गोलरक्षक जोर्डन पिकफर्ड गोल्डेन ग्लोभ्स जितिसकेको अवस्थामा आफ्नो क्लिनसिटको सिलसिलालाई निरन्तरता दिन चाहन्छन् । डिफेन्समा उनलाई लुक शा, जोन स्टोन्स, ह्यारी मगाएर र काइल वाल्करले साथ दिनेछन् ।

डेनमार्कले भने लगातार दोस्रो खेलमा कुनै परिवर्तन गरेको छैन । आक्रमणमा मार्टिन ब्रेथवेट, कास्पर डोलबर्ग र डाम्सगार्ड नै निरन्तर छन् । मिडफिल्डमा थोमस डिलेनी र पिर एमिल होएबिएर छन् । सेन्टर डिफेन्समा आन्द्रिएस् क्रिस्टेन्सन, कप्तान सिमोन केयर र यानिक भेस्टेगार्ड छन् । विंगब्याकमा स्ट्राइगर लासन र जोएकिम माहेल छन् । गोलरक्षकको जिम्मेवारी कास्पर स्माइक्लले सम्हाल्नेछन् ।

वेम्बली स्टेडियममा हुने खेलमा इंग्ल्यान्ड अन्डरडग डेनमार्कलाई हराउँदै पहिलोपटक युरोपेली च्याम्पियनसिपको फाइनलमा पुग्ने दाउमा हुनेछ । इंग्ल्यान्डले १६ मध्ये १० संंस्करणमा छनोट हुदा दुईपटक तेस्रो स्थान हासिल गरेको छ । सन् १९६८ र १९९६ मा तेस्रो स्थान हात पार्नु नै टोलीको लागि सबैभन्दा राम्रो नतिजा हो ।

यसपटक लयमा रहेको इंग्ल्यान्ड त्यो भन्दा माथि उठ्न चाहन्छ । डेनमार्कलाई हराउन सके इंग्ल्यान्ड पहिलोपटक युरोको फाइनलमा पुग्नेछ । पछिल्लो ११ खेलमा अपराजित इंग्ल्यान्ड सोही अपराजित यात्रालाई डेनमार्कविरुद्धको खेलमा पनि निरन्तरता दिने लक्ष्यमा हुनेछ ।

सन् २०२० नोभेम्वरमा नेसन्स लिगमा बेल्जियमसँग २–० ले पराजित भएयता इंग्ल्यान्डले १० जित र १ बराबरीको नतिजा निकालेको छ । त्यसअघि १५ अक्टोवर २०२० मा इंग्ल्यान्डले डेनमार्कसँग नेसन्स लिगमै १–० को हार बेहोरेका कारण टोली डेनमार्कविरुद्ध सचेत भएर खेल्नेछ ।

इंग्ल्यान्डको फाइनल यात्रामा ह्यारी केन र रहिम स्टर्लिङ नायक बन्न सक्नेछन् । यसबाहेक टोलीसँग जाडोन सान्चो, मासन माउन्ट, डिक्लन रिस, केल्भिन फिलिप्स, लुक सा, ह्यारी मगाएर, जोन्स स्टोन्स, काइल वाल्कर र गोलरक्षक जोर्डन पिकफोर्ड रहेका छन् ।

यस्तै फिल फोडेन, बुकायो साका, ज्याक ग्रेयालिस, डोमिनिक काल्भर्ट लेविन, मार्कुस रासफोर्ड, जोर्डन हेन्डरसन, विन ह्वाइट, बेन चिलवेल र रिस जेम्स टोलीमा रहेका छन् । इंग्ल्यान्डले क्वाटरफाइनलमा युक्रेनमाथि ४–० को सानदार जित दर्ता गर्दै सेमिफाइनलमा स्थान पक्का गरेको थियो ।

यता, अन्डरडगको छवि बनाएको डेनमार्क बलियो इंग्ल्यान्डलाई स्तब्ध पार्दै २९ वर्षपछि युरोको फाइनल पुग्ने दाउमा हुनेछ । डेनमार्कले सन् १९९२ मा अप्रत्यासित रुपमा युरोको उपाधि जितेको थियो । त्यसपछि डेनमार्कले चार संस्करणको युरो खेल्दा सन् २००४ मा क्वाटरफाइनलसम्मको यात्रा तय गरेको थियो ।

डेनमार्क सन् २०१६ को युरोमा छनोट हुन असफल भएको थियो । समुह चरणको सुरुवाती दुई खेल गुमाएर बाहिरिने संघारमा पुगेको डेनमार्कले त्यसपछि अनपेक्षित नजिता निकाल्दै सेमिफाइनलको यात्रा तय गर्न सफल भएको छ ।

डेनमार्कले समूह चरणको अन्तिम खेलमा रसिया तथा नकआउट चरणमा वेल्स र चेक रिपब्लिकलाई हराएको थियो । बुधबार डेनमार्कले वेम्बलीमा इंग्ल्यान्डको सामना गर्दा अर्काे एक तथ्य पनि बन्न सक्छ । सन् १९९२ मा टोली युरो च्याम्पियन बन्दा पाएको अविश्वनीय नतिजा ।

सन् १९९२ डेनमार्क युरोको लागि अन्तिम चरणका लागि छनोट भएको थिएन, तर युगोस्लाभियालाई युरोबाट हटाइएपछि डेनमार्कले खेल्न अवसर पाएको थियो । त्यतिबेला डेनमार्कले खेलेरमात्र होइन, उपाधि नै जितेर देखाइदियो । सायद यही कथा यही युरोमा पनि दोहोरिन सक्नेछ ।

समूह चरणको पहिलो खेलमा फिनल्यान्डविरुद्धको पहिलो खेल ४१ मिनेटपछि डेनमार्कका एरिक्सन मैदानमै ढले । यो खेल जारी राख्न डेनमार्कलाई सजिलो थिएन, तर खेल्नैपर्ने बाध्यता थियो । खेल्यो तर उसले खेल मात्र गुमाएन, त्यसपछि बेल्जियमसँग पराजित भयो ।

धेरैले अनुमान गरेका थिए डेनमार्कले समूह चरण पार गर्न सक्दैन भनेर तर, समूह चरणको अन्तिम खेलमारुसलाई प्रभावशाली ढंगले हराएर र भाग्यले साथ दिएपछि टिम नकआउट चरण पुगेको थियो । यसअघि युरोमा कुनै पनि टिमले सुरुआती दुई खेल गुमाएर दोस्रो चरण पुगेको कसैलाई थाहा थिएन । अहिले यही टिम सेमिफाइनलमा इंग्ल्यान्डसँग खेल्दैछ ।

टोलीसँग कास्पर स्माइकल, कप्तान सिमोन कासर, मार्टिन ब्रेथवेट, कास्पर डालवर्ग, युस्सुफ पाउल्सेन, पिएरे इमिल होब्जजर्ग र आन्द्रेस क्रिस्टेन्सेनलगायतको खेलाडीको साथ रहेको छ । यसबाहेक टोलीमा मिक्केल डाम्सगार्ड, जोआकिम, थोमस डिलाने, जेन्स लार्सन र भेस्टेरगार्ड पनि रहेको छ ।

यि दुई टोलीबीचको इतिहास हेर्दा इंग्ल्यान्ड बलियो देखिएको छ । यि दुई टोलीको हालसम्मको २१ खेलको नतिजामा इंग्ल्यान्ड १२ खेलमा विजयी भएको छ । चार खेल डेनमार्कले आफ्नो पक्षमा पार्दा ५ खेल बराबरीमा सकिएको छ ।

पछिल्लो ६ खेलको नतिजा हेर्दा डेनमार्क बलियो देखिएको छ । डेनमार्कले तीन खेल आफ्नो पक्षमा पार्दा दुई खेल इंग्ल्यान्डले जितेको छ । एक खेल गोलरहित बराबरीमा सकिएको छ । सोही कारण पनि खेल रोमाञ्चक र प्रतिस्पर्धात्मक हुने अपेक्षा गरिएको छ ।