एजेन्सी – युरोपका शीर्ष क्लबहरुले स्थापना गरेको युरोपेली सुपर लिगविरुद्ध युरोपेली फुटबलको सर्वोच्च निकाय यूईएफएले कुनै कारवाही गर्न नपाउने भएको छ । सुपर लिगमा अझै उपस्थित रहेका तीन क्लबले शुक्रबार संयुक्त विज्ञप्ति जारी गर्दै यसबारे जानकारी दिएका छन् ।

यूईएफएले कारवाही गर्ने भनेपछि १२ मध्य ९ क्लबले नाम फिर्ता लिएका थिए । तर रियल म्याड्रिड, बार्सिलोना र युभेन्टसले भने आफ्नो उपस्थिति कायम राख्ने जनाउँदै मुद्दा दायर गरेका थिए । यूईएफएले यसअघि कारवाही गर्ने तयारी गरेकोमा अब सबै प्रक्रिया रद्द हुनेछ । यूईएफएले यसबारे अपिल गरेपनि अदालतले उक्त अपिल रद्द गर्दै कुनै कारवाही गर्न नपाउने बताएको हो ।

अब लक्जेम्बर्गस्थित युरोपेली अदालतले यूईएफएले युरोपेली फुटबलमा गरेको एकपक्षीय गतिविधिको छानविन गर्नेछ । यससँगै सुपर लिग पुन: सुरु हुने सम्भावना बढेको छ । यसअघि इंग्लिस प्रिमियर लिगका ६ क्लबसँगै इन्टर मिलान, एसी मिलान र एटलेटिको म्याड्रिडले सुपर लिगबाट नाम फिर्ता लिएका थिए । सुपर लिगमा सहभागी हुने निर्णयमा समर्थकले व्यापक विरोध गरेपछि क्लब पछि हटेका थिए । यी क्लबलाई यूईएफएले जरिवाना समेत गराएको थियो ।

सुपर लिगले अब कारवाही गरेका सबै क्लबको जरिवाना फिर्ता हुनुपर्ने जनाएको छ । यसबाहेक यूईएफएले सुपर लिगको कुनैपनि कार्यक्रममा रोक लगाउन नपाउने पनि अदालतले निर्णय गरेपछि अब प्रतियोगिता हुने सम्भावना रहेको छ । हाल उपस्थित तीन क्लबले कुन कदम चाल्नेछन् भन्ने हेर्न बाँकी छ । यसअघि १२ संस्थापक क्लबसँगै ४ टोली थप गर्ने प्रारम्भिक योजना रहेको थियो ।