एजेन्सी – ब्राजिली गोलरक्षक एलिसन बेकरले इंग्लिस क्लब लिभरपुलमा सम्झौता नविकरण गरेका छन् । एलिसनले बुधबार लिभरपुलसँग ६ वर्षको लामो सम्झौता नविकरण गरेका हुन् ।

यो सम्झौता नविकरणसँगै २८ वर्षीय एलिसन सन् २०२७ सम्म मर्सिसाइड क्लब लिभरपुलमा रहनेछन् । एलिसन सन् २०१८ मा इटालियन क्लब रोमाबाट लिभरपुल आएका थिए । त्यसयता एलिसनले लिभरपुलमा लगातार उच्च प्रदर्शन गरिरहेका छन् । लिभरपुलले उनको प्रदर्शनलाई मध्यनजर गर्दै क्लबमा लामो समयसम्मको लागि अनुबन्ध गरेको बुझिएको छ ।

यो समरमा लिभरपुलमा सम्झौता नविकरण गर्ने एलिसन तेस्रो खेलाडी हुन् । यसअघि ट्रेन्ट एलेक्सान्डर आर्नाेल्ड र फाविन्होले समान ५ वर्षको सम्झौता नविकरण गरेका छन् । लिभरपुलमा लामो समयसम्मको लागि सम्झौता नविकरण गरेसँगै एलिसनले खुशी लागेको बताएका छन् ।

‘म र मेरो परिवार यहाँ साँच्चिकै खुशी छौं । मेरा बच्चाहरु यहाँ फरक देशमा सेटल भइसकेका छन् । हामी निकै खुशी छौं ।’ सम्झौता नविकरणपछि एलिसनले भने, ‘म साँच्चै खुशी छु । मैले यहाँ राम्रो गरिरहेको अनुभुति भएको छ । यो निर्णयमा म साँच्चै खुशी छु । यहाँ मलाई सहज नै छ ।’

२८ वर्षीय एलिसन आइतबारदेखि टोलीको प्रशिक्षण क्याम्पमा जोडिएका छन् । उनले सिरी ‘ए’ प्रतिद्धन्द्धी बोलोग्नाविरुद्धको मैत्रीपुर्ण खेल खेल्ने सम्भावना छ । एलिसनले च्याम्पियन्स लिग, प्रिमियर लिगसँगै अन्य केही खेल्दै गरेको अवस्थामा हामीले हाम्रो लक्ष्य तय गर्दै जित्न कै लागि खेल्ने बताएका छन् ।

एलिसन सन् २०१६ मा ब्राजिली क्लब नासिनोलबाट इटालियन क्लब रोमामा आएका थिए । रोमामा दुई सिजन बिताएपछि उनी ६७ मिलियन पाउन्डमा लिभरपुलमा अनुबन्धित भएका थिए ।

एलिसनले लिभरपुलबाट तीन सिजनमा १३० खेल्दा १ गोल गरेका छन् । उनले लिभरपुलबाट समान एक प्रिमियर लिग, च्याम्पियन्स लिग र फिफा क्लब विश्वकप जितेका छन् । ब्राजिलबाट सन् २०१९ मा कोपा अमेरिका कप जितेका छन् ।