एजेन्सी – स्पेनिस फरवार्ड डिएगो कोस्टा ब्राजिली सिरी ‘ए’ क्लब एट्लेटिको मिनेइरोमा अनुबन्धित भएका छन् । पूर्व ब्राजिली फरवार्ड कोस्टाले स्पेनिस क्लब एट्लेटिको म्याड्रिडसँगको सम्झौता सकिएपछि ब्राजिलियन क्लब मिनेइरोमा अनुबन्धित भएका हुन् ।

गत डिसेम्बरदेखि नै एट्लेटिकोबाट खेल्ने अवसर नपाएका कोस्टालाई एट्लेटिको मिनेइरोले आइतबार फ्रि एजेन्टमार्फत २०२२ डिसेम्बरसम्मको लागि सम्झौता गरेको जनाएको छ । कोस्टा सन् २०१८ मा इंग्लिस क्लब चेल्सीबाट एट्लेटिको आएका थिए । उनले एट्लेटिकोबाट ६१ खेलमा १२ गोल गरेका छन् ।

ब्राजिलमा जन्मिएर पनि ३२ वर्षीय कोस्टाले पहिलोपटक ब्राजिली क्लबबाट खेल्न लागेका हुन् । ब्राजिलका लागि भने कोस्टाले दुई खेल खेलेका छन् । सन् २०१३ मा स्पेनको नागरिकता पाएपछि कोस्टाले स्पेनबाट खेल्दै आएका छन् । ब्राजिलको राष्ट्रिय टोलीमा अवसर नपाएपछि उनले स्पेनबाट खेल्ने निर्णय लिएका थिए । स्पेनको लागि उनले २४ खेलमा १० गोल गरेका छन् । सन् २०१८ यता कोस्टाले स्पेनिस टोलीमा स्थान बनाउन सकेका छैनन् ।

व्यावसायिक खेल करियरमा ८ बढी क्लबबाट खेलेका कोस्टाले चेल्सीबाट दुई प्रिमियर लिग र एकपटक फुटबल लिग कप जितेका छन् । एट्लेटिकोबाट दुई ला लिगा, तीन युइएफए सुपरकप, एक युरोपा लिग र एक कोपा डेल रे जितेका छन् ।