एजेन्सी – युईएफए च्याम्पियन्स लिगको प्ले अफको पहिलो लेगमा मोल्दोभाको एफसी सेरिफ टिरासपोल, युक्रेनी क्लब साख्तर डोनेस्क र अष्ट्रियन क्लब साल्जवर्गले सफलता हात पारेका छन् ।

मंगलबार राति मोल्दोभाको एफसी सेरिफ टिरासपोलले प्ले अफको पहिलो लेगको खेलमा क्रोएसियन क्लब डिनामो जाग्रिवलाई ३–० ले पराजित गर्दै च्याम्पियन्स लिगको समूह चरणमा स्थान बनाउने सम्भावना बलियो बनाएको छ । घरेलु मैदानमा मंगलबार राति भएको खेलमा सेरिफको जितमा एडमा ट्राओरेले दुई तथा डिमिट्रिस कोलोभोसले एक गोल गरे ।

खेलमा ३८ प्रतिशत बल पोसेसन राखेको सेरिफले चार सट प्रहार गर्दा तीन गोल गर्न सफल भएको थियो । दोस्रो लेगमा यही नतिजा कायम राख्न सके एफसी सेरिफ क्लब इतिहासमै पहिलोपटक च्याम्पियन्स लिगलाई छनोट हुनेछ ।

अर्काे खेलमा फ्रान्सेली क्लब मोनाको घरेलु मैदानमा युक्रेनी क्लब साख्तर डोनेस्कसँग १–० ले पराजित भएको छ । साख्तरको जितमा पेडरिन्होले पहिलो हाफमा गरेको गोल नै निर्णायक बन्यो ।

अर्काे खेलमा अष्ट्रियन क्लब रेडबुल साल्जवर्गले डेनिस क्लब ब्रोन्डवी आइएफमाथि २–१ को पूनरागमन जित निकालेको छ । चौथो मिनेटमा मिकाइल उह्रेको गोलबाट पछि परेको साल्जवर्गले दोस्रो हाफमा करिम एडियानी र ब्रेन्डेन आरोन्सनको गोलबाट जित निकाल्न सफल भएको हो । दोस्रो लेगमा यही नतिजा कायम राख्ने सके साल्जवर्ग च्याम्पियन्स लिगलाई छनोट हुनेछ ।

आज (बुधबार) राति तीन खेलमा प्रतिस्पर्धा हुदैछ । बेन्फिका र पीएसभी इन्डहोभेन, माल्मो र लुडागोेरेट्स राजग्राड तथा योङ ब्वाइज र फेरेन्कभारोसबीच प्रतिस्पर्धा हुँदैछ ।

प्लेअफबाट ६ टोलीले च्याम्पियन्स लिगको समूह चरणमा स्थान बनाउनेछन् । दोस्रो लेगका खेलहरु २४ र २५ अगस्टमा राति हुनेछ । २६ अगस्टमा च्याम्पियन्स लिगको समूह विभाजन हुदैछ ।