एजेन्सी – युरोपियन फुटबलको सरुवा बजार बन्द हुन अब दुई साता बाँकी छ । यस्तो रियल म्याड्रिडको प्राथमिकतामा पेरिस सेन्ट जर्मेन (पिएसजी) का युवा फरवार्ड केलियन एमबाप्पेलाई भित्राउनु रहेको छ । तर, रियलको त्यो मात्र योजना छैन ।

रियलका अध्यक्ष फ्लोरिन्टिनो पेरेजले २२ वर्षे एमबाप्पे र बोरुसिया डटमर्डका २१ वर्षे फरवार्ड इर्लिङ हालान्डका बारेमा पनि सोचेका थिए । यी दुई फरवार्ड अहिलेका प्रतिभावान युवा फरवार्डमा पर्छन् । यी खेलाडीलाई भित्राउन सकेको अवस्थामा आउने एक दशक युरोपियन फुटबलमा दबदबा बनाउन सकिने विश्वास रियलको छ ।

क्रिस्टियानो रोनाल्डोको पूनरागमनका विषयमा चलेको चर्चाको जवाफमा रियलका प्रशिक्षक कार्लो एन्सेलोटीले आफूहरुले रोनाल्डोबारे नसोचेको बताएका थिए । अप्रिल १ मा इर्लिङका पिता अल्फिगी हालान्ड र उनका एजेन्ट राइलो दुई बैठकका लागि स्पेन पुगेका थिए । बिहान उनीहरुले बार्सिलोनाका अध्यक्ष जोन लार्पोटासँग भेट गरेका थिए । तर त्यो बैठक प्रभावकारी हुन नसकेको बताइएको थियो ।

त्यसै दिनमा रियलका जोसे एन्जेल सान्चेज र जुनी कालाफाटसँग भएको उनीहरुको भेट भने गम्भिर रहेको बताइन्छ । हालार्डलाई भित्राउनका लागि क्लबहरुको आर्थिक अवस्थाका बारेमा दुई बैठकमा छलफल भएको थियो । जसमा बार्सिलोना त्यसका लागि सक्षम देखिएन भने रियल देखियो । लार्पोटा आफ्नो क्लबको आर्थिक अवस्था कमजोर भएको लुकाउन चाहन्थे । पेरेज भने साच्चै खेलाडी भित्राउन चाहिरहेका थिए ।

खेलाडी भित्राउनका लागि हाल रियलसँग २ सय मिलियन युरो उपलब्ध छ । त्यसअर्थ रियल १ सय ६० मिलियनसम्म पनि खर्च गर्न तयार छ । त्यस्तो हुँदा ७५ देखि ९० मिलियन युरोमा अर्को सिजन हालान्डलाई भित्राउन सकिनेछ । तर, परिस्थिति सधै एकनाश छैन । यदि पिएसजीका अध्यक्ष नासिर अफ खालिफाले रियलको प्रस्ताव नसुनेको खण्डमा हालान्ड टोलीको पहिलो प्राथमिकतामा पर्नेछन् ।

त्यस्तो अवस्थामा डर्टमुन्डसँग छलफल गर्नुपर्ने हुन्छ । जर्मन टोली पनि हालान्डलाई तत्काल विक्री गर्न चाहदैन । तर, अर्को सिजन कुर्दा केहि रकम गुम्ने खतरा भएकोले टोलीले त्यसमा पुनर्विचार पनि गर्ने सम्भावना रहेको बताइन्छ ।