एजेन्सी – साविक विजेता म्यानचेस्टर सिटीले इंग्लिस प्रिमियर लिगमा पहिलो जित दर्ता गर्दा नर्विच सिटीमाथि ५–० को सानदार जित हात पारेको छ ।

पहिलो खेलमा टोटेनहम हटस्परसँग हार बेहोरेको सिटीको फराकिलो जितमा ज्याक ग्रेलिस, एमेरिक लापोर्टा, रहिम स्टर्लिङ र रियाद महारेजले गोल गर्दा एक गोल उपहार पाएको थियो । पहिलो हाफमा दुई तथा दोस्रो हाफमा तीन गोल भएको थियो ।

इतिहाद स्टेडियममा खेलको सातौं मिनेटमा नै टिम क्रुलको आत्मघाती गोलबाट सिटीले खेलमा अग्रता लिएको थियो । ग्रान्ट हान्लीले क्रस बचाउने सुरमा बल क्रुललाई लाग्दै आफ्नै पोस्टमा गोल हुने पुगेको थियो । १५औं मिनेटमा फेरान टोरेसले गोल गरेपनि उक्त गोलको मुभमा भिएआरमा फउल देखिएको थियो । २२औं मिनेटमा यसै समरमा एस्टन भिल्लाबाट सिटी आएका ग्रेलिसले सिटीको लागि डेब्यु गोल गर्दै टोलीको अग्रता दोब्बर पारे । उनले गाब्रियल जेससको क्रसमा गोल गरेका थिए ।

६४औं मिनेटमा एमेरिक लापोर्टले गोल गरेपछि सिटी फराकिलो जिततर्फ अग्रसर बन्यो । ७१औं मिनेटमा वैकल्पिक खेलाडी रहिम स्टर्लिङले गोल गर्दै सिटीलाई ४–० ले अघि बढाए । ६१औं मिनेटमा फेरान टोरेसको स्थानमा मैदान छिरेका रहिमले जेससकै पासमा गोल गर्न सफल भएका थिए ।

८४औं मिनेटमा अर्का सब्सिच्युट रियाद महारेजले गोल गर्दै सिटीलाई ५–० को सानदार जित दिलाए । ७५औं मिनेटमा ज्याक ग्रेलिसको स्थानमा मैदान छिरेका महारेजले रुवेन डियासको पासमा गोल गर्न सफल भएका थिए । यो जितसँगै सिटीले दुई खेलबाट ३ अंक जोडेको छ । नर्विचले दुई खेलबाट अंक जोड्न सकेको छैन ।

अन्य नतिजा

एस्टन भिल्लाविरुद्ध न्युक्यासल (२–०)

क्रिस्टल प्यालेसविरुद्ध ब्रेन्टफोर्ड (०–०)

लिड्सविरुद्ध एभर्टन (२–२)