एजेन्सी – अर्जेन्टिनी सुपरस्टार लिओनेल मेस्सीले बार्सिलोना छाडेपछि अब क्लबकै एकेडेमी ला मासियाबाट आएका अर्का युवा खेलाडी अन्सु फातीले १० नम्बर जर्सी लगाउने तय भइसकेको छ ।

तर, फातीलाई अहिले नै यो जर्सी नम्बर दिनु सहि हो भन्नेबारे बार्सिलोना वृत्तमा प्रश्न उठेको छ । केहि समर्थकले फातीले त्यसका लागि आफूलाई प्रमाणित गरिसकेको बारेमा शंका व्यक्त गरेका छन् । त्यसमाथि पनि चोटका कारण उनी १० महिनापछि मैदान फर्कने क्रममा छन् । उनले पुरानै लयमा खेल्न सक्छन् सक्दैन अहिले भन्न सकिने अवस्था छैन ।

चोटपछि फातीको शल्यक्रिया गरिएको थियो । त्यसपछि पनि उनको चोटमा केहि जटिलता आएको थियो । प्रशिक्षक रोनाल्ड कोम्यानले फाती फर्कनको लागि तयार भएपनि खेलाउनका लागि हतार नगरिने बताएका छन् । यति छिट्टै फातीलाई १० नम्बरको जर्सी नहुने तर्क पनि आउन थालेका छन् ।

क्याप नोउमा १० नम्बर जर्सी लगाउने खेलाडीले माथिल्लो स्तरमा प्रदर्शन गरेका छन् । मेस्सी भन्दा अगाडि रोनाल्डिन्हो, हुवा रोमन रिक्विल्मी र रिभाल्डोले १० जन्मर जर्सी लगाएका थिए । फाती त्यो स्तरमा पुगेका छैनन् भन्ने सबैलाई थाहा छ । उनले त्यसका लागि लामो यात्रा तय गर्नुपर्नेछ । यो निर्णयले उनीमाथि थप दबाब आउने आँकलन पनि रहेको छ ।

बार्सिलोना युवा स्टारबाट भविष्यमा राम्रो गर्ने अपेक्षा गरेको छ । चोटअघि उनले आफ्नो क्षमतालाई मैदानमा प्रदर्शन पनि गरेका थिए । त्यति बेला मेस्सी, एन्टोइन ग्रिजमन र लुइस स्वारेज जस्ता खेलाडीको साथ थियो । अहिले तीनै खेलाडी क्लबमा छैनन् । त्यसका बाबजुद पनि क्लबमा मेस्सीले छाडेको छापलाई फातीले भविष्यमा पछ्याउने अपेक्षा भने राखिएको छ ।