एजेन्सी – जेसे लिङ्गार्डले दुई गोलसँगै एक असिस्ट तथा बुकायो साकाले एक गोल र अर्काे गोलको लागि असिस्ट दिएपछि इंग्ल्यान्डले विश्वकप छनोटको युरोपेली छनोटमा सानदार जित हात पारेको छ ।

घरेलु मैदानमा इंग्ल्यान्डले एन्डोरामाथि ४–० को सहज जित हात पारेको हो । दोस्रो हाफमा मैदान प्रवेश गरेका कप्तान ह्यारी केन र बुकायो साकाले समान एक गोल थपे ।

वेम्वली स्टेडियममा आइतबार राति भएको खेलको १८औं मिनेटमा जेसे लिङ्गार्डको गोलबाट इंग्ल्यान्डले पहिलो हाफमा १–० को अग्रता बनाएको थियो । ७२औं मिनेटमा सब्सिच्युट कप्तान ह्यारी केनले पेनाल्टीमार्फत गोल गर्दै इंग्ल्यान्डको अग्रता दोब्बर पारे ।

मेसान माउन्टलाई पेनाल्टी बक्समा गार्सियाले फउल गरेपछि रेफ्रीले इंग्ल्यान्डलाई पेनाल्टी प्रदान गरेको थियो । जसमा ६२औं मिनेटमा प्याट्रिक बामफोर्डको स्थानमा मैदान छिरेका कप्तान केनले कुनै गल्ती गरेनन् ।

७८औं मिनेटमा जेसे लिङ्गार्डले बुकायो साकासको पासमा व्यक्तिगत दोस्रो तथा टोलीका लागि तेस्रो गोल गर्दै टोलीलाई सहज जिततर्फ अग्रसर गराए । ८५औं मिनेटमा बुकायो साकाले लिङ्गार्डको पासमा गोल गर्दै इंग्ल्यान्डलाई ४–० को सानदार जित दिलाए ।

जितपछि इंग्ल्यान्डले समूह ‘आई’ मा चरणमा लगातार पाँचौ जित दर्ता गर्दै शीर्षस्थानम यथावत रहेको छ । पराजित एन्डोरा ३ अंक जोडेर पाँचौ स्थानमा रहेको छ । यही समूहको अर्काे खेलमा पोल्यान्डले सान मारिनोमाथि ७–१ को सानदार जित दर्ता गर्दा हंगेरी अल्वानियासँग १–० ले स्तब्ध बनेको छ ।

यो नतिजापछि पोल्यान्ड १० अंक जोडेर दोस्रो स्थानमा उक्लिएको छ । अल्वानिया ९ अंक जोडेर तेस्रो स्थानमा रहँदा हंगेरी ७ अंक जोडेर चौथो स्थानमा झरेको छ । सान मारिनोले अंकको खाता खोल्न सकेको छैन ।