एजेन्सी – इटालियन सिरी ‘ए’ मा युभेन्ट्स र एसी मिलानले बराबरी खेल्दै अंक बाँडेका छन् । घरेलु मैदानमा अग्रता लिएपनि त्यसलाई जोगाउन नसक्दा युभेन्ट्सले एसी मिलानसँग १–१ गोलको बराबरी खेल्दै अंक बाँडेको हो ।

एलिएन्ज स्टेडियम टोरिनोमा आइतबार राति भएको खेलको चौथो मिनेटमा नै अल्भारो मोराटाको गोलबाट घरेलु टोलीले अग्रता लिएको थियो । उनले पाउलो डिबालाको पासमा गोल गरेका थिए । १६औं मिनेटमा एलेक्स सान्द्रोको लो क्रसमा मोराटाको प्रहारलाई मिलानका गोलरक्षक मिक मेइगनानले बचाउँदा युभेन्ट्सले अग्रता दोब्बर पार्नबाट चुक्यो ।

१८औं मिनेटमा डिबालाको प्रहारमा गोलरक्षक मेइगनान नै बाध बने । ४३औं मिनेटमा पिएरे कालुलुको पासमा एन्टी रेविचको प्रहार पोस्ट नजिकैबाट बाहिरियो । ६९औं मिनेटमा राफयल लियोको प्रहार पास्ट नजिकैबाट बाहिरिदा मिलान बराबरीबाट चुक्यो ।

७६औं मिनेटमा एन्टी रेबिचले गोल गर्दै खेललाई १–१ गोलको बराबरीमा ल्याए । उनले सान्द्रो टोनालीको पासमा गोल गर्न सफल भएका थिए । ८३औं मिनेटमा ब्राहिम डियाज चुक्दा मिलानले खेलमा अग्रता लिने अवसर गुमायो ।

८६औं मिनेटमा एड्रिएन राविओटको पासमा मोइस किनको प्रहार पोस्ट नजिकैबाट बाहिरियो । ८७औं मिनेटमा कालुलुको प्रहारलाई गोलरक्षक वजनिएस सिजेस्नीले बचाउँदै युभेन्ट्सको हार टारे ।

यो नतिजापछि युभेन्ट्सले नयाँ सिजनको सिरी ‘ए’ मा जित निकाल्न सकेन । सिरी ‘ए’ मा चार खेल खेल्दा युभेन्ट्सले दुई बराबरी र दुई हारको नतिजा निकालेको छ ।

बराबरीपछि मिलानले शीर्ष स्थानमा उक्लने मौका गुमाएको छ । समान १० अंक रहेपनि मिलान दोस्रो स्थानमा तथा इन्टर मिलान शीर्षस्थानमा रहेको छ । युभेन्ट्स २ अंक जोडेर १८औं स्थानमा रहेको छ ।