एजेन्सी – फ्रेन्च लिग वानमा पेरिस सेन्ट जर्मेन (पीएसजी) ले शत प्रतिशत जितलाई निरन्तरता दिदा शीर्षस्थानमा फराकिलो अग्रता लिन सफल भएको छ ।

लगातार आठौं जित निकाल्ने क्रममा पीएसजीले घरेलु मैदानमा मोन्टपेलिएरमाथि २–० को सहज जित निकालेको हो । पार्क डेस प्रिन्सेसमा पीएसजीको जितमा इड्रिसा गाना गुआई र जुलियन ड्राक्सलरले गोल गरे । पहिलो र दोस्रो हाफमा समान एक गोल निस्किएको थियो ।

प्रतिस्पर्धात्मक खेलको १४औं मिनेटमा इड्रिसा गाना गुआईको गोलमा पीएसजीले अग्रता लिएको थियो । उनले एन्जल डि मारियाको पासमा गोल गरेका थिए । ४२औं मिनेटमा एन्डर हेरेराको प्रहार क्रसबारमा लागेर फर्कदा पीएसजी अग्रता दोब्बर पार्नबाट चुक्यो ।

६७औं मिनेटमा अचरफ हाकिमीको पासमा केलियन एमबाप्पेले १८ यार्डबाट गरेको प्रहार पोस्ट नजिकैबाट बाहिरियो । ७१औं मिनेटमा एन्डर हेरेराको पासमा नेयमारको प्रहारले पनि पोस्टको दिशा लिन सकेन । ८८औं मिनेटमा जुलियन ड्राक्सलरले गोल गर्दै पीएसजीको जित पक्का गरे । उनले नेयमारको पासमा गोल गर्न सफल भएका थिए ।

जितपछि पीएसजीको ८ खेलबाट २४ अंक पुगेको छ । दोस्रो स्थानमा रहेको मार्सेको ७ खेलबाट १४ अंक छ । जुन १० अंकले पछि हो । पराजित मोन्ट पेलिएर ९ अंक जोडेर ११औं स्थानमा रहेको छ ।

अन्य नजिता

सेन्ट इटिएनविरुद्ध निस (०–३)

स्टार्सवर्गविरुद्ध लिल (१–२)

लियोनविरुद्ध लोरिएन्ट (१–१)