एजेन्सी – डच फरवार्डद्धय मेम्फिस डिपाए र लुक डि जोङसँगै १० महिनापछि मैदान फर्किएको अन्सु फातीको गोलमा क्याटलान क्लब बार्सिलोनाले स्पेनिस ला लिगामा सहज जित निकालेको छ ।

घरेलु मैदान नोउ क्याम्पमा बार्सिलोनाले लेभान्टेलाई ३–० ले पराजित गरेको हो । खेलको सातौ मिनेटमा डिपाएको पेनाल्टी गोलबाट बार्सिलोनाले अग्रता लिएको थियो । मिरामोनको पासमा राडोजाले नियन्त्रणमा लिने प्रयास गर्दा भेट्न नसकेको बलमा डिपाएलाई फल गर्न पुगेपछि बार्सिलोनाले पेनाल्टी पाएको थियो । जसलाई डिपाएले चुकाएनन् ।

१४औं मिनेटमा लुक डि जोङले गोल गर्दै बार्सिलोनाको अग्रता दोब्बर पारे । उनले सर्जिनो डेस्टको पासमा गोल गरेका थिए । २३औं मिनेटमा जेरार्ड पिकेले गोल गर्ने सुवर्ण अवसर खेर फाले । ३६औं मिनेटमा गाभिराको पासमा डिपाएको प्रहारलाई मिरामोनले क्लियर गर्दै अर्काे गोल टारे । ४३औं मिनेटमा डिपाएले अर्काे सुवर्ण अवसर खेर फाल्दा बार्सिलोनाले अग्रतालाई बढाउन सकेन ।

८३औं मिनेटमा पाब्लो मार्टिनेजको प्रहारलाई बार्सिलोनाका गोलरक्षक मार्क आन्दर टेर स्टेगनले बचाउँदा लेभोन्टेले गोल अन्तर कम गर्न सकेन ।

इन्ज्युरी समयको थप गरिएको पहिलो मिनेटमा सब्सिच्युट फरवार्ड अन्सु फातीले गोल गर्दै बार्सिलोनाको जित पक्का गरे । फाती ८१औं मिनेटमा लुक डि जोङको स्थानमा मैदान छिरेका थिए । गत नोभेम्वरमा चोट बोकेयता उनले पहिलोपल्ट खेल्दै गोल गर्न सफल भएको हो ।

यो जितसँगै अपराजित रहेको बार्सिलोना ६ खेलबाट १२ अंक जोडेर पाँचौ स्थानमा उक्लिएको छ । बार्सिलोना शीर्ष स्थानको रियल म्याड्रिडसँग ५ अंकले पछि छ । यद्दपि बार्सिलोनाले एक खेल कम खेलेको छ । पराजित लेभान्टे ४ अंक जोडेर १७औं स्थानमा छ ।