एजेन्सी – फरवार्ड मेम्फिस डिपाएले दुई गोलसँगै दुई असिस्ट दिएपछि नेदरल्यान्ड्सले फिफा विश्वकप कतार २०२२ को युरोपेली छनोटमा सानदार जित दर्ता गरेको छ ।

घरेलु मैदानमा नेदरल्यान्ड्सले जिब्राल्टारमाथि ६–० को फराकिलो जित आत्मसात गरेको हो । नेदरल्यान्ड्सको फराकिलो जितमा डिपाएले दुई गोल गर्दा भर्जिल भान डाइक, डेन्जेल डेम्फ्रेज, अर्नाउट डानजुमा र डोनियल मालेनले समान एक गोल गरे । गोलको वर्षा भएको खेलमा डच टोलीले पहिलो र दोस्रो हाफमा समान तीन गोल गरेको थियो ।

स्टेडियम फेइजेनोर्ड रोटरडाममा सोमबार राति भएको खेलको नवौं मिनेटमा भर्जिल भान डाइकको गोलबाट डच टोलीले अग्रता लिएको थियो । उनले मेम्फिस डिपाएको पासमा गोल गरेका थिए । १९औं मिनेटमा डिपाएले पेनाल्टी चुकाउँदा नेदरल्यान्ड अग्रता दोब्बर पार्नबाट चुक्यो । डि भिरिजको कर्नरबाट आएको बललाई ग्राइमी टोरिल्लाले ह्यान्ड गर्न पुगेपछि रेफ्रीले भिएआरको सहायता लिदै डच टोलीलाई पेनाल्टी प्रदान गरेको थियो ।

पेनाल्टी चुकाएपनि २१औं मिनेटमा डिपाएले डाभी क्लासेनको पासमा गोल गर्दै डच टोलीको अग्रता दोब्बर पारे । पहिलो हाफको इन्ज्युरी समयको थप गरिएको तेस्रो मिनेटमा डिपाएले गोल गर्दै ड टोलीलाई पहिलो हाफमा ३–० को आरामदायी अग्रता बनाए ।

४८औं मिनेटम डेन्जेल डेम्फ्रेजले गोल गर्दै नेदरल्यान्ड्सलाई फराकिलो जिततर्फ अग्रसर गराए । उनले नोआ लाङको पासलाई सदुपयोग गरेका थिए । ७५औं मिनेटमा वैकल्पिक खेलाडी अर्नाउट डानजुमाले अर्काे सब्सिच्युट वोआउट वेगह्रस्टको पासमा गोल गर्दै डच टोलीलाई ५–० ले अघि बढाए ।

८६औं मिनेटमा अर्काे सब्सिच्युट डोनीयल मालेनले गोल गर्दै डच टोलीलाई ६–० को फराकिलो जित दिलाए । ७८औं मिनेटमा नोआ लाङको स्थानमा मैदान छिरेका मालेनले डिपाएको पासमा गोल गर्न सफल भएका थिए ।

यो जितसँगै समूह ‘जी’ मा नेदरल्यान्ड्स ८ खेलबाट १९ अंक जोडेर शीर्षस्थानमा रहेको छ । पराजित जिब्राल्टार अंकविहीन हुदै पुछारमा छ ।यही समूहको अर्काे खेलमा टर्कीले लात्भियालाई २–१ ले तथा नर्वेले मोन्टेनग्रोलाई २–० ले पराजित गरेको छ ।

यो नतिजापछि नर्वे १७ अंक जोडेर दोस्रो तथा १५ अंकसहित टर्की तेस्रो स्थानमा छ । मोन्टेनेग्रो ११ अंक जोडेर चौथो स्थानमा रहँदा लात्भिया ५ अंक जोडेर पाँचौ स्थानमा छ ।