काठमाडौं (हाम्रो खेलकुद) – ए डिभिजन क्लब न्यु रोड टिम (एनआरटी) ले नयाँ सिजनमा फिजियोथेरापी सेवाका लागि अर्थोप्लास्ट रिह्याबिलिटेसन सेन्टरसँग सम्झौता गरेको छ ।

विहीबार एक कार्यक्रमबीच एनआरटीका टिम व्यवस्थापक सुरेन्द्र श्रेष्ठ र अर्थोप्लास्टका मेडिकल डाइरेक्टर सुरज भुषालले सम्झौता पत्रमा हस्ताक्षर गरे । सम्झौता अनुसार अर्थोप्लास्टले लिग अवधिभर फिजियोथेरापी सेवा प्रदान गर्नेछ । अर्थोप्लास्टका फिजियो सौगात श्रेष्ठ टोलीको फिजियोको रुपमा रहनेछन् । श्रेष्ठले गत महिना सम्पन्न एभरेस्ट प्रिमियर लिगमा पनि च्याम्पियन टोली चितवन टाइगर्समा जिम्मेवारी निर्वाह गरेका थिए ।

अर्थोप्लास्टका डाइरेक्टर भुषाल आफैं पनि ए डिभिजन लिगको साविक विजेता मच्छिन्द्र क्लबसँग आबद्ध छन् । अर्थोप्लास्टले महिला भलिबलको च्याम्पियन होंगान्जी न्यु डायमन्डसँग पनि सहकार्य गर्दै आएको छ । फिजियो उज्ज्वल डोटेल न्यु डायमन्डसँगै महिला राष्ट्रिय भलिबल टोलीको फिजियोको रुपमा पनि नियुक्त भएका थिए ।

पछिल्लो समय क्लबहरुले खेलाडीको स्वास्थ्यलाई ध्यानमा राख्दै फिजियो राख्दै आएका छन् । एएफसीको क्लब लाइसेन्सिङको मापदण्ड अनुसार हरेक टोलीले फिजियो अनिवार्य रुपमा राख्नुपर्ने प्रावधान रहेको छ ।

ललितपुरको ग्वार्कोमा अवस्थित अर्थोप्लास्ट पछिल्लो समय खेलकर्मीमाझ रोजाइमा पर्दै आएको छ । खेलसँग सम्बन्धित विशेषज्ञ फिजियोथेरापिस्ट भएकाले पनि खेलाडीहरु यहाँ आउने गरेका छन् । अर्थोप्लास्टले खेलकुदका लागि बेग्लै विभाग नै स्थापना गरेको छ ।