काठमाडौ (हाम्रो खेलकुद)- काठमाडौं वडा नं १६ ले दोस्रो प्रयागराज सिंह सुवाल स्मृति अन्तर वडा फुटसल प्रतियोगितामाको उपाधि जितेको छ ।

काठमाडौं महानगरपालिका वडा नं २३ को आयोजनामा लैनचौर फुटसल मैदानमा भएको फाइनलमा वडा नं १६ ले वडा नं १२ लाई ५-२ ले हरायो ।

पहिलो मिनेटमै वडा नं १२ का खेलाडीले आत्मघाती गोल गरेपछि वडा नं १६ ले अग्रता बनाएको थियो । त्यसपछि आयुष कुँवर, रविन निरौला र सुजत डंगोलले गोल गरी विजयी टिमलाई ४–० को आरामदायक अग्रता दिलाए ।

मनोज महर्जन र सिद्धार्थ देउलाको गोलबाट वडा १२ ले खेलमा फर्किने प्रयास गरेको थियो । तर खेल सकिनै लाग्दा श्रेयान्स मानन्धरले गोल गरेपछि वडा १६ फराकिलो गोल अन्तरसहित च्याम्पियन बन्यो । श्रेयान्स फाइनलको प्लेयर अफ दि म्याच पनि बने ।

उपाधि विजेता वडा १६ ले ट्रफीसहित २ लाख रुपैयाँ र दोस्रो वडा १२ ले ट्रफी र १ लाख रुपैयाँ प्राप्त गर्यो
वडा नं १६ का आयुष कुँवर प्रतियोगिताकै सर्वश्रेष्ठ खेलाडी घोषित हुनुभयो ।

उपाधि विजेता टिमकै मनोज महर्जन सर्वाधिक गोलकर्ता बने । उत्कृष्ट गोलरक्षकको पुरस्कार वडा नं १२ का मनोज महर्जनले प्राप्त गरे। व्यक्तिगत विधातर्फ उत्कृष्ट तीनै जना खेलाडीले जनही १० हजार रुपैयाँ प्राप्त गरे ।

काठमाडौं महानगरपालिकाका प्रशासकिय प्रमुख सरोज गुरागाईँ तथा आयोजक वडा नं २३ का अध्यक्ष मचाराजा महर्जनलगायतले विजेता र दोस्रो टोलीलाई पुरस्कृत गरे।

अध्यक्ष महर्जनले वडा नं २३ ले अर्को वर्ष तेस्रो संस्करण अझ भव्यताका साथ आयोजना गर्ने बताए।
असोज १ गते सुरु भएको नकआउट प्रतियोगितामा काठमाडौं महानगरपालिका केन्द्रसहित ३१ वडाले भाग लिएका थियो ।