काठमाडौं (हाम्रो खेलकुद) – विश्व जुनियर नम्वर एक तथा रिभाइव लिजरपार्कका प्रिन्स दाहाल र त्रिभुवन आर्मी क्लबकी रशिला महर्जन दोस्रो प्रधानमन्त्री कप खुला र्‍याङकिङ ब्याडमिन्टन प्रतियोगिताको च्याम्पियन बनेको छ ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा बिहीबार भएको खेलमा प्रिन्स पुरुष एकलतर्फ तथा रशिला महिला एकलमा च्याम्पियन बनेका हुन् । प्रिन्सले पाँचौं वरीयताका आर्मीका नविन श्रेष्ठमाथि २–० को सोझो सेटमा जित निकाल्दै वर्षको पहिलो दिन नै उपाधि जित्न सफल भएको हो ।

एकपक्षीय खेलमा प्रिन्सले पहिलो सेट २१–१७ र दोस्रो सेट २१–१० ले सहजै हरायो । गत वर्ष प्रिन्सले चार फाइनल खेल्दा दुईमा उपाधि जित्न सफल भएको थियो । रिभाईव लिजरपार्क च्याम्पियनसिपमा शीर्ष वरीयताका रत्नजित तामाङसँग पराजित भएका प्रिन्सले पुष्पलाल र जेस्ट ओपनमा दिपेश धामीलाई पराजित गर्दै उपाधि जित्न सफल भएका थिए । भक्तपुरमा भने प्रिन्स दिपेशसँगै नै पराजित भएको थियो ।

महिला एकलमा आर्मीकी रशिलाले आफ्नै क्लबकी अनुमाया राईलाई २१–१२ र २१–१६ ले हराउँदै वर्षको पहिलो उपाधि जित्न सफल भयो । गत वर्ष रशिलाले आफुले सहभागिताा जनाएको सबैमा उपाधि जित्न सफल भएको थियो । पुरुष एकल र महिला एकलको विजेता प्रिन्स र रशिलाले समान १ लाख १५ हजार रुपैयासहित शिल्ड हात पारे । दोस्रो भएको नविन र अनुमायाले ५५ हजार रुपैया प्राप्त गरे । तेस्रो भएको जेशिका गुरुङ र प्रार्थना देउवाले समान १५ हजार हात पारिन् ।

पुरुष डबल्समा रिभाइभका प्रिन्स र आर्मीका नविन श्रेष्ठको जोडीले आर्मीका पविन लिङ्थेप र सुरोज महर्जनको जोडीलाई १८–२१, २१–९ र २१–१८ ले हराउँदै उपाधि जिते । पुरुष डबल्सको विजेता प्रिन्स र नविनले ५० हजार रुपैया हात पारे । दोस्रो भएका पविन र सुरोजको जोडीले २५ हजार र तेस्रो भएका दिपेश धामी र विजित थापामगरको जोडी र विधान अधिकारी रविशाल खड्काको जोडी समान १० हजार प्राप्त गरे ।

यु–१५ ब्वाइज एकलमा सिल्क ग्रुपका कविर केसीले एनआरएनका साहिल चन्दलाई २१–१९ र २१–१७ ले हराउँदै उपाधि जित्दा सोही विधाको गल्स एकलमा आर्मीकी रोज पाण्डेले बिबिएकी रोजी राईलाई २१–६ र २१–१० ले हराएर उपाधि जितिन् । यु–१५ को ब्वाइज र गल्सको विजेताले १० हजार, दोस्रोले ५ हजार तथा तेस्रोले समान ३ हजार प्राप्त गरे ।

यु–१९ ब्वाइज एकलमा आर्मीका सन्तोष पनेरुले सिल्क ग्रुपका नरेन्द्र बमलाई २१–१२, १९–२१ र २१–१७ ले हराउँदै उपाधि हात पारे । यु–१९ गल्स एकलमा आर्मीकी प्रार्थना देउवाले आर्मीकै रोज पाण्डेलाई २१–१९, १३–२१ र २१–१४ ले हराउँदै उपाधि जित्न सफल भइन् । यु–१९ को ब्वाइज र गल्सको विजेताले समान १५ हजार, दोस्रोले ७ हजार र तेस्रो हुनेले ३ हजार ५ सय हात पारे ।

हरिलाल धर्मदेवी स्मृति प्रतिष्ठान र अपी स्पोर्ट्स म्यानेजमेन्ट प्रालिद्वारा २८ चैतदेखि संयुक्त रुपमा आयोजित प्रतियोगिताको विजयी खेलाडीलाई राखेपका सदस्यसचिव टंकलाल घिसिङलगायतले पुरस्कृत गरे ।