काठमाडौं (हाम्रो खेलकुद) – विभागीय डर्वी भिडन्तमा नेपाल एपिएफ क्लबको चुनौती पन्छाउँदै नेपाल पुलिस क्लब बागमती प्रदेश न्यू डायमन्ड कप खुल्ला महिला राष्ट्रिय भलिबल प्रतियोगिताको च्याम्पियन बनेको छ ।

कीर्तिपुरस्थित इन्द्रायणी बहुउद्देश्यीय कभर्डहलमा शनिबार भएको फाइनलमा एपिएफलाई ३–० को सोझो सेटमा पराजित गर्दै पुलिस अपराजित रहेर च्याम्पियन बनेको हो । पुलिसले राउन्ड रोविन लिगमा एपिएफमाथि ३–१ को सेटमा जित निकालेको थियो ।

पहिलो सेटमा २५–१६ को सेटमा जित निकालेको पुलिसले दोस्रो सेटमा २७–२५ को रोमाञ्चक जित निकाल्दै जिततर्फ अघि बढ्यो । एक समय ६ अंकले पछि रहेको पुलिसले उत्कृष्ट पूनरागमन गर्दै जित निकाल्न सफल भयो। तेस्रो सेटमा २५–१९ को सेटमा जित निकाल्दै पुलिस च्याम्पियन बन्न सफल भयो ।

उपाधिसँगै पुलिसले ५ लाख रुपैया र शिल्ड हात पारेको छ । दोस्रो भएको एपिएफले २ लाख ५० हजार रुपैयाँ हात पारे । तेस्रो भएको होङ्गान्जी न्यु डायमन्ड स्पोर्ट्स क्लबले १ लाख २५ हजार तथा चौथो भएको परोपकार आदर्श माध्यमिक विद्यालयले ७५ हजार रुपैयाँ हात पारेको छ । डायमन्डले शनिबारै परोपकारलाई २५–१२, २५–१४ र २५–२३ को सोझो सेटमा जित निकाल्दै तेस्रो स्थान हासिल गरेको छ ।

प्रतियोगिताको मुख्य उद्देश्य न्यू डायमन्ड स्पोर्ट्स क्लबको आफ्नै भलिबल कोर्ट निर्माण सहयोगार्थ रहेकाले पुरस्कार बापतको २० प्रतिशत दिनुपर्नेछ । प्रतियोगितामा राष्ट्रिय टोलीको प्रशिक्षणमा रहेका २४ खेलाडीले भने खेलेका थिएनन् ।

नेपाल पुलिस क्लबकी कोपिला राना प्रतियोगिताको सर्वाेत्कृष्ट खेलाडी चुनिँदै २५ हजार रुपैयाँ र ट्रफी हात पारिन् । न्यु डायमन्डकी सलिना बुढा मगर उदियमान खेलाडी हुँदै २० हजार रुपैयाँसँगै ट्रफी हात पारिन् । एपिएफकी रेश्मा भण्डारी उत्कृष्ट स्पाइकर, एपिएफकै उषा कुमारी विष्ट उत्कृष्ट ब्लकर, पुलिसकी कमला पुन उत्कृष्ट सेटर, डायमन्डकी एन्जिला प्रधान उत्कृष्ट लिवेरो र पुलिसका रुपेश कुमार विष्ट उत्कृष्ट प्रशिक्षक चुनिए । उनीहरुले समान १० हजार रुपैयाँ र शिल्ड हात पारे ।

विजयी टोली तथा खेलाडीलाई बागमती प्रदेशका युवा तथा खेलकुद मन्त्री रत्न प्रसाद ढकाल, उपाध्यक्ष हिक्मत थपलिया, क्लबकी अध्यक्ष सुनकेशरी माली, नेपाल भलिबल संघका महासचिव जितेन्द्र बहादुर चन्दलगायतले पुरस्कृत गरे । प्रदेश खेलकुद विकास परिषद बागमती प्रदेश तथा न्यू डायमन्ड स्पोर्ट्स क्लबको संयुक्त आयोजनामा गत मंगलबारदेखि शुरु भएको प्रतियोगितामा चार टोलीले राउन्ड रोविन लिगको आधारमा प्रतिस्पर्धा गरेका थिए । शीर्ष दुई टोलीले फाइनलमा पुनः प्रतिस्पर्धा गरेका थिए ।

प्रतियोगिताको सर्वाेत्कृष्ट
सर्वाेत्कृष्ट – कोपिला राना (पुलिस)
उदियमान – सलिना बुढामगर (डायमन्ड)
स्पाइकर – रेश्मा भण्डारी (एपिएफ)
ब्लकर – उषा कुमारी विष्ट (एपिएफ)
सेटर – कमला पुन (पुलिस)
सर्भर – कोपिला उप्रेती (पुलिस)
लिवेरो – एन्जिला प्रधान (डायमन्ड)
प्रशिक्षक – रुपेश कुमार विष्ट (पुलिस)