एजेन्सी – संघर्षपूर्ण जित निकाल्दै दोस्रो वरीयताका स्पेनिस टेनिस स्टार राफायल नाडाल विम्बल्डन टेनिसको सेमिफाइनलमा प्रवेश गरेका छन् ।
सेन्टर कोर्टमा बुधबार राति भएको क्वाटरफाइनलमा पेटको चोटको बावजुत नाडालले अमेरिकी टेनिस स्टार टेलर फ्रिट्जमाथि ३–२ को सेटमा जित निकाल्दै अन्तिम चारको यात्रा तय गर्न सफल भएका हुन् ।
नाडालले पहिलो सेट ३–६ ले गुमाएको थियो । दोस्रो सेटमा ७–५ को जित निकाल्दै नाडाल खेलमा फर्किएको थियो । तेस्रो सेट पुनः नाडालले ३–६ ले गुमाउन पुगेको थियो । चौथो सेटमा पुनः ७–५ को जित निकालेको नाडालले पाँचौ सेट ७–६ (१०–४) ले आफ्नो पक्षमा पार्न सफल भयो । खेल चार घन्टा २१ मिनेट चलेको थियो ।
३६ वर्षीय नाडालको यो ३ सय १०औं ग्रान्डस्लाम जित हो । कीर्तिमानी २२औं पटकको ग्रान्डस्लाम विजेता नाडालले दुई पटक विम्बल्डनको उपाधि जितेका छन् । सर्वियन नोभाक जोकोभिच र स्वीस रोजर फेडेररले समान २० पटक ग्रान्ड स्लाम जितेका छन् ।
‘म यस्तो खालको खेल खेल्दा धेरै रमाइलो गर्छु ।’ नाडालले खेलपछि भने, ‘यो एक कठिन जित हो । जसले सबै सिजन उत्कृष्ट खेल्दै आएको छ, यो सजिलो थिएन, त्यसैले म सेमिफाइनलमा पुग्न पाउँदा धेरै खुसी छु ।’
‘सामान्यतया शरीर ठीक छ, तर पक्कै पनि पेटमा केहि गलत भइरहेको छ । मैले अलि फरक तरिका अपनाए ।’ नाडालले भने, मैले सोचें कि म खेल जित्न सक्नेछैन । तर यो कोर्ट र उर्जा अर्कै छ ।’
सेमिफाइनलमा शुक्रबार नाडाल र किर्गियोस भिड्दैछन् । ‘म खेल्नको लागि तयार हुने आशा गर्छु । निक सबै खेलाडीहरूमा उत्कृष्ट खेलाडी हुन् ।’
यस्तै अष्ट्रियाका निक किर्गियोसले क्रिस्टियन गारिनलाई ३–० को सोझो सेटमा हराउँदै नाडालसँगको भेट पक्का गरेको छ । किर्गियोसले गारिनमाथि ६–४, ६–३ र ७–६ को सेटमा जित निकाल्न सफल भयो ।
किर्गियोस सन् २००५ पछि विम्बल्डनको सेमिफाइनलमा पुग्ने पहिलो अष्ट्रियाका खेलाडी बनेका छन् ।
