काठमाडौं (हाम्रो खेलकुद) – गण्डकी प्रदेशमाथि सोझो सेटमा जित निकाल्दै विभागीय त्रिभुवन आर्मी क्लब काठमाडौंमा जारी सातौ एनभिए राष्ट्रिय महिला तथा पुरुष क्लब भलिबल च्याम्पियनसिपको महिलातर्फ सेमिफाइनलमा प्रवेश गरेको छ ।

आर्मी समूह ‘बी’ बाट लगातार दुई जित निकाल्दै एक खेल बाँकी छँदै अन्तिम चारमा पुग्न सफल भएको हो । त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा बुधबार भएको खेलमा आर्मीले गण्डकीमाथि २५–११, २५–१० र २५–१५ को सहज जित निकाल्यो ।

आर्मीकी साफिया पुन केल्मी प्लेयर अफ दि म्याच घोषित भइन् । उनले केल्मी नेपालबाट गिफ्ट ह्याम्पर प्राप्त गरिन् । आर्मीले दुई खेलबाट ६ अंक जोड्यो । गण्डकीले लगातार दोस्रो हार बेहोरेको छ । लगातार दोस्रो हारसँगै गण्डकीको सेमिफाइनल पुग्ने सम्भावना झिनो बनेको छ ।

समूह ‘बी’ मा एपिएफको ३ अंक छ । गण्डकीले अंकको खाता खोल्न सकेका छैन । कृष्ण सेकेन्डरी एकेडेमीले पनि अंक जोड्न सकेको छैन । यो समूहमा अब आर्मीले एपिएफसँग खेल्न बाँकी छ । एपिएफले आर्मी र कृष्ण सेकेन्डरी सुकलसँग खेल्न बाँकी छ ।

समूह ‘ए’ बाट साविक विजेता न्यु डायमण्ड युथ स्पोर्ट्स क्लब र नेपाल पुलिस क्लबले सेमिफाइनलमा स्थान बनाइसकेको छ ।

आज (बुधबार) पुरुषतर्फ न्युटन र ढोरपाटन, पुलिस र गण्डकी, हेल्प नेपाल र केशवलाल तथा जावलाखेल र सैलुङ बााघढुंगा रामेछापबीच प्रतिस्पर्धा हुँदैछ ।