काठमाडौं (हाम्रो खेलकुद) – विभागीय नेपाल पुलिस क्लब समूह ‘सी’ को विजेता बन्दै काठमाडौंमा जारी सातौ एनभिए राष्ट्रिय महिला तथा पुरुष क्लब भलिबल च्याम्पियनसिपको पुरुषतर्फ क्वाटरफाइललमा प्रवेश गरेको छ ।

पुलिसले आफ्नो समूहको अन्तिम खेलमा गण्डकी प्रदेशलाई ३–१ को सेटमा पराजित गर्दै समूह विजेता बन्दै अन्तिम आठमा पुगेको हो ।

त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा बुधबार भएको खेलमा पुलिसले पहिलो सेट २५–२३ ले आफ्नो पक्षमा पारेको थियो ।

दोस्रो सेटमा २५–२१ को जित निकालेको पुलिसले प्रतिस्पर्धात्मक बनेको तेस्रो सेट २४–२६ ले गुमाउन पुगेको थियो । चौथो सेटमा भने पुलिसले २५–१५ को सहज जित निकाल्न सफल भयो ।

हारका बावजुत गण्डकीको अन्तिम आठमा पुग्ने सम्भावना छ । पुलिसले ३ खेलबाट ९ अंक जोड्यो । गण्डकीको ३ तथा ढोरपाटनको २ तथा न्युटन भलिबल एकेडेमीको १ अंक छ ।

यस्तै पुरुषतर्फ टिप टप हेल्प नेपाल स्पोर्ट्स क्लबले केशवलाल स्मृति भलिबल प्रशिक्षण केन्द्रलाई २५–१८, २५–१८ र २५–१३ को सोझो सेटमा हराएर क्वाटरफाइनलमा पुगेको छ । पराजित केशवलालको पनि क्वाटरफाइनल पुग्ने सम्भावना छ । समूह ‘डी’ मा हेल्प नेपालको २ खेलबाट ६ अंक छ । बुढानिलकण्ठ र केशवलालको समान ३ अंक छ । मधेस अंकविहीन छ ।

यस्तै सैलुङ बाघढुंगा स्पोर्ट्स क्लब रामेछापले जावलाखेल भलिबल प्रशिक्षण केन्द्रलाई २५–२२, २५–८ र २५–२० को सोझो सेटमा पराजित गर्दै क्वाटरफाइनलमा पुगेको छ । लगातार दुई हारसँगै जावलाखेल बाहिरिएको छ । शैलुङको जितले एपिएफ पनि क्वाटरफाइनलमा पुगेको छ ।