पोखरा (हाम्रो खेलकुद) – होङ्गान्जी न्यु डायमण्ड युथ स्पोर्ट्स क्लबले पोखरामा जारी तेस्रो टाइगर कप राष्ट्रिय तथा अन्तर्राष्ट्रिय आमन्त्रित खुल्ला क्लब च्याम्पियनसिप महिला तथा पुरुष भलिबल प्रतियोगितामा लगातार दोस्रो हार बेहोरेको छ ।

पोखरा रंगशालास्थित भलिबल कोर्टमा मंगलबार बिहान भएको खेलमा डायमण्डले साविकको विजेता एपिएफसँग ३–० को सोझो सेटमा पराजित हुँदै लगातार दोस्रो हार बेहोरेको हो । यसअघि डायमण्ड आर्मीसँग पनि ३–० कै सोझो सेटमा पराजित भएको थियो ।

मुख्य स्पाइरक प्रतिभा माली विनाको डायमण्डले एपिएफलाई १५–२५, २०–२५ र ७–२५ ले नतिजा सुम्पियो । लगातार दोस्रो हारसँगै डायमण्डले अंकको खाता खाेल्न सकेकाे छैन । अब डायमण्डले राउन्ड रोविन लिगको अन्तिम खेलमा घरेलु टोली गण्डकी प्रदेशसँग खेल्दैछ ।

लगातार दोस्रो जितसँगै एपिएफकाे २ खेलबाट ६ अंक पुगेको छ । यसअघि एपिएफले पहिलो खेलमा घरेलु टोली गण्डकीलाई ३–० को सोझो सेटमा पराजित गरेको थियो ।

आज नै महिलातर्फ आर्मी र गण्डकीबीच प्रतिस्पर्धा हुँदैछ । पुरुषतर्फ पुसिल र सेन्ट जोसेफ तथा गण्डकी र एपिएफबीच प्रतिस्पर्धा हुँदैछ ।

महिलातर्फ चार टोली रहेकाले लिगको शीर्षस्थानमा रहने टोलीले चौथो स्थानको टोलीसँग फाइनल पुग्न प्रतिस्पर्धा गर्दा लिगको दोस्रो र तेस्रो हुनेले दोस्रो सेमिफाइनल खेल्नेछ ।

पुरुषतर्फ ५ टोली रहँदा एक टोली बाहिरिदा शीर्ष चार टोलीले सेमिफाइनल खेल्नेछ । लिगको शीर्षस्थानमा रहने टोलीले चौथो स्थानको टोलीसँग फाइनल पुग्न प्रतिस्पर्धा गर्दा लिगको दोस्रो र तेस्रो हुनेले दोस्रो सेमिफाइनल खेल्नेछ ।

टाइगर ग्रुप अफ पोखरा नेपालको आयोजनामा गत आइतबारदेखि सुरु भएको प्रतियोगितामा महिलातर्फ ४ र पुरुषतर्फ ५ टोलीको सहभागिता रहेको छ । महिलातर्फ एपिएफ, आर्मी, डायमण्ड र गण्डकीको सहभागिता छ । यसअघि सहभागी हुने भनिएका दुई टोली नेपाल पुलिस क्लब र भारतको केरेला स्टेट इलेक्ट्रोनिक बोर्डले भाग लिएनन् ।

पुरुषतर्फ त्रिभुवन आर्मी क्लब, सेन्ट जोसेफ वाज स्पोर्टस् क्लब श्रीलंका, नेपाल पुलिस, एपिएफ र गण्डकी प्रदेश गरी ५ टोलीको सहभागिता रहेको छ । पहिलो संस्करणमा पुरुषतर्फ गण्डकी र महिलामा पुलिस च्याम्पियन बनेको थियो । दोस्रो संस्करणमा महिलातर्फ एपिएफ र पुरुषतर्फ आर्मी च्याम्पियन टोली हो ।

महिला–पुरुष दुवैतर्फ उपाधि विजेताले ५ लाख र उपविजेताले २ लाख ५० हजार प्राप्त गर्नेछन् । तेस्रोले १ लाख २५ हजार र सान्त्वना हुनेले ६५ हजार प्राप्त गर्नेछन् । हरेक दिनको खेलमा उत्कृष्ट खेलाडीले ५ हजार र ३ हजार रुपैयाँ बराबरको स्वास्थ्य परीक्षण सुविधा पाउने छ । दुवै इभेन्ट्समा सर्वोत्कृष्ट खेलाडीले जनही २५ हजार तथा विधागततर्फका उत्कृष्टले समान १० हजार प्राप्त गर्नेछन् ।