विराटनगर (हाम्रो खेलकुद) – नेपाल पुलिस क्लबका प्रिन्स दाहालले पुष्पलाल स्मृति राष्ट्रिय वरियता ब्याडमिन्टन प्रतियोगितामा ह्याट्रिक उपाधि जित्न सफल भएका छन् ।

विराटनगरमा आइतबार भएको लिनिङ्ग १२औं संस्करणको पुरुष एकलतर्फको फाइनलमा आर्मीका प्रफुल महर्जनलाई पराजित गर्दै प्रिन्स लगातार तेस्रोपटक च्याम्पियन बन्नदै ह्याट्रिक उपाधि जित्न सफल भएका हुन् ।

प्रिन्सले शीर्ष १६ वरीयताभित्रको पुरुष एकलको फाइनलमा प्रफुललाई २१–१४ र २१–१७ ले पराजित गर्न सफल भए । पहिलो सेटमा सहज जित पाएको प्रिन्सले दोस्रो सेटमा १–८ ले पछि परेको अवस्थालाई उल्ट्याएर २१–१७ को जित निकाल्न सफल भयो ।

पछिल्लो ८ दिन भित्रमा दोस्रो उपाधि तथा प्रफुल माथि पनि यो दोस्रो जित हो । यसअघि गत साता इटहरीमा सम्पन्न प्रथम मुख्यमन्त्री राष्ट्रिय वरीयता ब्याडमिन्टन प्रतियोगितामा प्रफुललाई हराउँदै प्रिन्सले उपाधि जितेका थिए । पुलिसका बिष्णु कटुवाल र आर्मीका रुकेश महर्जन संयुक्त रुमा तेश्रो भए ।

उपाधिसँगै प्रिन्सले ५० हजार रुपैयाँसहित मेडल, ट्रफी र प्रमाणपत्र प्राप्त गरे । प्रफुलले ३० हजार र तेस्रो भएका विष्णु र रुकेशे क्रमश १४ हजार र १२ हजार ५ सय हात पारे । विजयी खेलाडीलाई पूर्व प्रधानमन्त्री नेकपा एमालेका अध्यक्ष केपी शर्मा ओलीले पुरस्कृत गरे ।

लगातार तीन संस्करणमा जित हात पार्ने खेलाडीलाई राष्ट्रिय ब्याडमिन्टन संघ, नेपालले स्कुटर प्रदान गर्ने घोषणा बमोजिम अर्को संस्करणको उद्घाटनका अवसरमा प्रिन्सलाई स्कुटर प्रदान गरिने जनाएको छ ।

नेकपा एमालेको भातृसंस्था नेपाल खेलकुद महसंघ अन्तरगत रहेको राष्ट्रिय ब्याडमिन्टन संघको आयोजनामा भएको महिलाको शीर्ष १२ वरीयता भित्रको एकलतर्फ आर्मीकी अनुमाया राईले ८ दिन अघि इटहरीमा सम्पन्न मुख्यमन्त्री राष्ट्रिय वरीयता ब्याडमिन्टन प्रतियोगिताकी विजेता एपिएफकी जेशिका गुरुङलाई १८–२१, २१–१७ र २१–६ ले पराजित गर्दै उपाधि जित्न सफल भइन् ।

पुष्पलालमा अनुको लगातार दोस्रो उपाधि हो । राष्ट्रिय च्याम्पियन आर्मीकी रशिला महर्जन र प्राथना देउवा तेस्रो भइन् । च्याम्पियन अनुमायाले ५० हजारसहित मेडल, ट्रफी र प्रमाणपत्र प्राप्त गरिन् । जेशिकाले २८ हजार ५ सय र तेस्रो भएकी रशिलाले १२ हजार ५ सय र प्राथनाले ११ हजार रुपैयाँसहित मेडल, ट्रफी र प्रमाणपत्र प्राप्त गरिन् ।

पुरुषको शीर्ष १६ वरीयता बाहेकमा आर्मीका पविन लिनथेपलाई पराजित गर्दै एपिएफका सुजन थापाले उपाधि जिते । आर्मीका हिमाल चन्द र एपिएफका प्रनिश सिंह ठकुरीले तेस्रो भए ।

महिला शीर्ष १२ बाहेकमा आर्मीकी बिश्ना बिष्टले झापाकी अन्जना राईमाथि १९–२१, २१–१९, २१–१९ को कठिन जित निकालदै उपाधि जितिन् । पाँचथरकी रिना तामाङ र आर्मीकी टिशा रानी शाक्य संयुक्त तेश्रो भइन् ।

पुरुष युगलतर्फ पुलिसका बिष्णु कटुवाल र प्रिन्स दाहालको जोडीले एपिएफका बिजीत थापा मगर र पुलिसका जीवन आचार्यको जोडीलाई पराजित गर्दै उपाधि जिते । आर्मीका प्रफुल महर्जन र रुकेश महर्जनको जोडी तथा कास्कीका विधान अधिकारी र पविन लिनथेपको जोडी संयुक्त तेश्रो भए ।

महिला युगलतर्फ एपिएफकी शोभा गौचन र पुलिसकी निता लम्सालको जोडीलाई पराजित गर्दै आर्मीर्की प्राथना देउवा र अनुमाया राईले उपाधि जिते । एपिएफका जेशिका गुरुङ र सुनयना मुखियाको जोडी तेस्रो भइन् ।

पुरुष यु१७ मा एपिएफका रोशन साउदले आर्मीका अनिल मल्ललाई पराजि तगर्दै पहिलो भए । आर्मीका कविर केसी र दाङका सनौला रैनी संयुक्त तेश्रो भए ।

महिला यु१७ मा आर्मीकी रिहाना शेरचनले आर्मीर्क टिशा रानी शाक्यलाई हराएर पहिलो भइन् । कास्कीकी निभा राई र ताप्लेजुङकी नुमा लिम्बु संयुक्त तेश्रो भइन् ।

पुरुष ४५ बर्ष माथिको प्रतिस्पर्धामा काठमाडौंका संजय कपाली र श्याम लामाको जोडीले उपाधी जिते । पुरुष ५५ बर्ष माथिको प्रतिस्पर्धामा पाँचथरका रामराज आङ्गदम्बे र संजय भक्तराजको जोडीले जित हात पार्दै उपाधि उचाले ।

उच्च वरीयता बाहेकका महिला र पुरुष एकल, महिला र पुरुष युगल, भेट्रान ४५ बर्ष माथि र ५५ बर्ष माथिका प्रथम, द्वितीय र तृतीय हुने खेलाडीहरुले क्रमशः नगद २० हजार, १० हजार र ५ हजार तथा यु–१७ छात्र तथा छात्रा एकल तर्फका प्रथम, द्वितीय र तृतीय हुने खेलाडीहरुले क्रमशः १५ हजार, ८ हजार र ४ हजार नगदका साथै मेडल, ट्रफी र प्रमाणपत्र प्राप्त गरे ।

शहिद रंशालास्थित कभर्डहलमा फागुण २ देखि ७ गते सम्म आयोजना भएको प्रतियोगिताको सह–आयोजकमा मोरङ जिल्ला ब्याडमिन्टन संघ तथा मुख्य प्रायोजकमा ब्याडमिन्टन खेल सामाग्री उत्पादन संस्था लिनिङ रहेको थियो ।

सहप्रायोजकमा बिराटनगर महानगरपालिका, नेपाल टेलिकम रहेको थियो भने नेपाल खेलकुद महासंघले खेलाडीहरुका लागि खाने बस्ने ब्यवस्था गरेको थियो । करिव २४ लाख ८४ हजारको लागत रहेको प्रतियोगिताको पुरस्कार राशी ५ लाख ९८ हजार रहेको थियो ।