काठमाडौं (हाम्रो खेलकुद) – किङ्स क्लब काठमाडौंले राजधानी काठमाडौंमा जारी छैटौं ढोरपाटन पुरुष भलिबल च्याम्पियनसिपमा बिहीबार दोहोरो सफलता हात पारेका छन् ।
नयाँ बसपार्कस्थित ढोरपाटन भलिबल प्रशिक्षण केन्द्रको मैदानमा बिहीबार भएको खेलमा किङ्सले नेपाल गणतान्त्रिक खेलकुद महासंघमाथि ३–२ को रोमाञ्चक पूनरागमन जित निकाल्दा हिम रश्मी स्कुलमाथि ३–० को सोझो सेटमा जित निकाल्दै दोहोरो सफलता आत्मसात गरेको हो ।
पहिलो र दोस्रो सेट क्रमशः २४–२६ र १८–२५ ले गुमाएको किङ्सले त्यसपछिको तीनै सेट २५–१६, २५–२२ र २५–१२ ले जित्दै पूनरागमन जित दर्ता गर्न सफल भयो ।
हिम रश्मीमाथ भने किङ्सले २५–१८, २५–१९ र २५–१५ को सहज जित निकाल्न सफल भयो । अर्काे खेलमा न्युटन भलिबल एकेडेमीले सिन्धुपाल्चोक भलिबल संघलाई २५–२१, २५–१० र २५–१८ को जित निकाल्न सफल भयो । च्याम्पियनसिपमा शुक्रबार तीन खेल हुनेछ ।
च्याम्पियनसिपमा ११ टोलीको सहभागिता रहेको छ । सहभागी टोलीलाई दुई समूहमा विभाजन गरिएको छ । हरेक समूहका शीर्ष दुई टोलीले सेमिफाइनलमा स्थान पक्का गर्नेछ । फाइनल २२ चैतमा हुनेछ ।
च्याम्पियनसिपको विजेताले २ लाख ५० हजार, कप र मेडल प्राप्त गर्नेछ । दोस्रो हुनेले १ लाख २५ हजार, कप र मेडल प्राप्त गर्नेछ । तेस्रो हुनेले ६५ हजार, कप र मेडल प्राप्त गर्नेछ । च्याम्पियनसिपको सर्वाेत्कृष्ट खेलाडीले १० हजार रुपैया प्राप्त गर्नेछ ।
व्यक्तिगत विधातर्फ स्पाइकर, सेटर, ब्लकर, सर्भर, डिफेन्डर र प्रशिक्षकले समान ५ हजार रुपैयाँ प्राप्त गर्नेछ । प्रशिक्षण ट्रेनिङ गरेका प्रशिक्षकलाई मात्रै उत्कृष्ट प्रशिक्षक प्रदान गरिने आयोजकले जनाएको छ ।
