काठमाडौं (हाम्रो खेलकुद) – एसिसी प्रिमियर कपको उपाधिको लागि नेपाल र युएईबीच प्रतिस्पर्धा हुने भएको छ । युएईले दोस्रो सेमिफाइनल खेलमा ओमानलाई डकवर्थ लेविस पद्धतिको आधारमा दुई रनले हराउँदै फाइनलमा स्थान पक्का गर्यो ।

उता घरेलु टोली नेपाल समूह विजेताको रुपमा फाइनलमा पुगेको छ । कुवेतसँगको पहिलो सेमिफाइनल भारी वर्षाको कारण खेल रद्द भएपछि नेपाल समूह विजेताको रुपमा फाइनलमा पुगेको हो । उपाधिको लागि नेपाल र युएईबीच सोमबार प्रतिस्पर्धा हुनेछ । प्रतियोगिता विजेता टोलीले एसिया कपमा भारत र पाकिस्तानसँग खेल्न पाउनेछ ।

यदि वर्षाको कारण फाइनलमा सोमबार र मंगलबार खेल वा सुपर ओभर पनि हुन सकेन भने वरियताको हिसाबमा नेपाल एसिया कपमा पुग्नेछ । नेपाल ओडिआइ वरियातामा १४ औं र युएई १९ औं स्थानमा छन् ।

पहिलो सेमिफाइनल खेलमा टियु क्रिकेट मैदानमा जितको लागि २ सय ८१ रनको विशाल विजयी लक्ष्य पछ्याएको कुवेतले ८.३ ओभरमा ६ विकेट गुमाउँदै ३७ रन बनाउँदा खेल वर्षाको कारण खेल रोकिएको थियो । तर त्यसपछि भारी वर्षा हुँदा सुपर ओभर पनि हुन सकेन । नेपाल समूह ए को विजेता र कुवेत समूह बी को उपविजेताको रुपमा सेमिफाइनल खेलेका थिए । खेल हुन नसकेपछि नेपाल समूह विजेताको रुपमा फाइनलमा पुगेको हो ।

उता मुलपानीमा जितको लागि २ सय ३७ रनको विजयी लक्ष्य पछ्याएको ओमानले ४३ ओभरमा ६ विकेट गुमाउँदै १ सय ९० रन बनाउदा वर्षाको कारण खेल रोकिएको थियो । युएई डकवर्थ लेविस पद्धतिको आधारमा तीन रनले अघि भएपछि दुई रनले विजयी भएको हो ।

४३ औं ओभरमा दुई विकेट गुमाउनु ओमानको लागि हारको कारण बन्यो । ४३ औं ओभरको तेस्रो बलमा आयन खान आउट हुनुअघि ओमान खेलमा ८ रनले अघि थियो । आयन खान आउट भएपछि ओमान अझै चार रनले अघि थियो । तर अन्तिम बलमा सन्दीप गौड आउट भएसँगै पराजित हुन पुगेको थियो । ओमानका कश्याप प्रजापति ४३ बलमा ९ चौकासहित ४९ रनमा आउट भए ।

स्पिनर कार्तिक मयाप्पनको बलमा एलबीडब्लू आउट भएपछि अर्धशतक पूरा गर्न एक रनले चुकेका थिए । ओमानलाई ओपनर कश्याप प्रजापति र जतिन्दर सिंहले १५।३ ओभरमा ७९ रनको साझेदारी गरेका थिए । तर प्रजापति आउट भएपछि बाँकी दुई विकेट लगातार गुमाएको थियो ।