काठमाडौं (हाम्रो खेलकुद) – नवौं संस्करणको नेपाल एमेच्योर ओपन गल्फ प्रतियोगिता अन्तर्गतको टिम स्पर्धामा नेपालले स्वर्ण पदक जितेको छ ।

नेपाल नम्बर एक एमेच्योर खेलाडी सुबास तामाङ र सद्भाव आचार्यको जोडीले दोस्रो दिन मंगलबार ७–अन्डर १ सय ३७ स्कोर जोडे । समग्रमा १७–अन्डर २ सय ७१ सहित भारतलाई १४ स्ट्रोकको फराकिलो अन्तरमा हराउँदै उनीहरुले नेपाललाई स्वर्ण दिलाएका हुन् ।

सुबासले ४–अन्डर ६८ र सदभावले ३–अन्डर ६९ स्कोर गरे । सुबास र सद्भावले यसअघि गत मार्चमा बंगलादेश एमेच्योर ओपन गल्फ च्याम्पियनसिपमा पनि टिमतर्फ स्वर्ण पदक जितेका थिए ।

समग्रमा ३–अन्डर २ सय ८५ सहित भारतले रजत पदक प्राप्त ग¥यो । मंगलबार सुमित कोटवालले ८–अन्डर ६४ र सुरज जोशीले २–ओभर ७४ स्कोर गरे । यो जोडीले समग्रमा ६–अन्डर १ सय ३८ स्कोर जोड्दै दोस्रो स्थान प्राप्त गरेको हो ।

समग्रमा ५–ओभर २ सय ९३ सहित भुटानले कास्य पदक हात पा¥यो । ७–ओभर १ सय ५१ स्कोर बनाउने क्रममा उगेन दोर्जीले १–अन्डर ७१ र कर्मा दोर्जी खोर्कोले ८–ओभर ८० मा खेल सकाए ।

प्रतियोगिताको व्यक्तिगततर्फ भारतीय सुमित कोटवाल ८–अन्डर ६४ को सानदार स्कोरमा शीर्षस्थानमा उक्लिएका छन् । उनले समग्रमा १२–अन्डर १ सय ३२ सहित पहिलो दिनका लिडर नेपालका सुबास तामाङलाई दुई स्ट्रोकले पछि पारेका छन् ।

४–अन्डर ६८ को कार्ड बनाएका सुबासले समग्रमा १०–अन्डर १ सय ३४ को स्कोर बनाउँदा दोस्रो स्थानमा झरे । सद्भाव आचार्यले आज ३–अन्डर ६९ को स्कोर निकाले । समग्रमा ७–अन्डर १ सय ३७ सहित उनी तेस्रो स्थानमा छन् ।

यसैगरी भुटानका उगेन दोर्जी समग्रमा ४–अन्डर १ सय ४० सहित चौथो, नेपालका टासी छिरिङ र भारतका बरूण मुथप्पा समग्रमा २–अन्डर १ सय ४२ सहित संयुक्तरुपमा पाँचौ स्थानमा रहे ।

यस्तै नेपालका वाङचेन ढोन्डुप र बंगलादेशका मोहम्मद सुमोन समग्रमा १–ओभर १ सय ४५ सहित सातौं तथा पाकिस्तान उमैर सलिम र नेपालका टासी डोङले समग्रमा ५–ओभर १ सय ४९ स्कोरका साथ संयुक्तरुपमा नवौं स्थान बाँडे ।

भारतका सुमितले बोगीरहित ८–अन्डरको स्कोर बनाउँदा फ्रन्ट र ब्याक नाइन दुवै ४–अन्डर ३२ मा सकाए । उनले दोस्रो, चौंथो, सातौं र आठौं होलमा बर्डी प्रहार गरे । त्यसपछि उनले १०औं, १४औं, १५औं र १८औं होलमा पनि एक–एक सट बचाए ।

सुबासले फ्रन्ट नाइन १–अन्डर ३५ मा पुरा गरे । पहिलो होलमा बोगी खेपेका उनले ५–पारको तेस्रो होलमा ईगलको सफलता प्राप्त गरे । सातौं होलमा बर्डी प्रहार गर्दा आठौं होलमा एक सट खेर फाले । यसपछि ११औं, १४औ र १८औं होलमा बर्डीको सफलता प्राप्त गर्दै ब्याक नाइन ३–अन्डर ३३ मा पुरा गरे ।

सद्भावले बोगी रहित राउण्ड खेले । फ्रन्ट नाइन ३–अन्डर ३३ र ब्याक नाइन इभन–पार ३६ मा सकाए। उनले तेस्रो, सातौं र आठौं होलमा बर्डी प्रहार गर्दा ब्याक नाइनको सबै होलमा पार बचाए ।

महिलातर्फ कश्मिरा शाहले ८–ओभर ८० स्कोर गरिन् । समग्रमा १४–ओभर १ सय ५८ सहित शीर्षस्थानमा उक्लिएकी छिन् । उनले पहिलो दिनकी लिडर सुष्मा सिग्देललाई ३ स्ट्रोकले पछि पारेकी छिन् । सुष्माले १२–ओभर ८४ स्कोर गर्दा समग्रमा १७–ओभर १ सय ६१ मा ३६ होलको खेल पुरा गरिन् । १४–ओभर ८६ सहित समग्रमा ४०–ओभर १ सय ८४ सहित तेस्रो स्थानमा छिन् ।

३६ होलको समाप्तीमा २०–ओभर १ सय ६४ सम्मको स्कोर बनाएका ३० खेलाडीले कट बनाएका छन् । जसमा १६ जना नेपाली खेलाडी रहेका छन् ।

नेपाल गल्फ संघ र नेपाल टुरिजम बोर्डद्वारा संयुक्त रुपमा आयोजित प्रतियोगितामा ४४ पुरुष र सात महिला गरी ५१ गल्फ खेलाडीको सहभागिता रहेको छ ।

प्रतियोगितामा पुरुष व्यक्तिगत, पुरुष टिम इभेन्ट र महिला व्यक्तिगत गरी तीन स्पर्धामा प्रतिस्पर्धा भैरहेको छ । ५४ होलको प्रतियोगितामा नेपाल, बंगलादेश, भुटान, भारत र पाकिस्तानका खेलाडीको सहभागिता रहेको छ ।

प्रतियोगितालाई राष्ट्रिय खेलकूद परिषद्, बागमती प्रदेश खेलकुद विकास बोर्ड, गोकर्ण फरेस्ट गल्फ रिसोर्ट र होटल रोयल सिंगीले सहषेग गरेका छन् ।