काठमाडौं (हाम्रो खेलकुद) – सूर्य नेपाल गल्फ टुर २०२२-२३ अन्तर्गत अन्तिम प्रतियोगिता, सूर्य नेपाल प्रिमियर गल्फ च्याम्पियनसिपको प्रो-एमको उपाधि व्यवसायिक गल्फर दिनेश प्रजापति र टिमले हात पारेको छ।

गोकर्ण गल्फ क्लबमा आयोजित प्रतियोगितामा दिनेशसहित एमेच्योर खेलाडीहरू समिर आचार्य, कर्णेल प्रताप बोहरा र अर्जुन कुमार कार्कीको टिमले १६२ अंक सहित उपाधि जितेको हो। दिनेश र समिरले ४१-४१ अंक जोडे भने प्रताप र अर्जुनले ४०-४० अंक प्राप्त गरे।

यसैगरि, प्रो भुवन‌ नगरकोटी र एमेच्योर खेलाडीहरु टासी छिरिङ्ग, उज्जवल प्रधानाङ्ग र सुनिल कार्कीको टोली १५३ अंक सहित दोश्रो स्थान प्राप्त गरे। भुवन, उज्जवल र सुनिलले समान ३८ अंक जोड्दा टासीले ३९ अंक बनाए। 

धरानका प्रो बलभद्र राई तथा एमेच्योर खेलाडीहरु भाईराजा पाण्डे, काल्साङ्ग लोधे शेर्पा र राजु थकाली १५१ अंक सहित तेश्रो भए। बलभद्रले ३७ अंक जोडे। एमेच्योर खेलाडीहरु भाईराजा, काल्साङ्ग र राजुले समान ३८ अंक बनाए। 

महिला तर्फ बेस्ट ईन्डिभिजुअल स्कोरको उपाधि रेखा घिमिरेले जितिन्। रेखा र आईन्स्टिना टण्डनले समान ३४ अंक जोडेपछि विजेताको छिनोफानो काउन्ट ब्याकमा गरिएको हो। रेखाले ब्याक नाईनमा १८ अंक जोडेकी थिईन भने १३-बर्षिया आईन्स्टिनाले १७ अंक बनएकी थिइन्।‌

मन्दीप केसी र भाईराजा पाण्डेले क्रमश  लङ्गेस्ट ड्राईभ र क्लोजेस्ट टु दि पिनको उपाधि हात पारे। स्टेवलफोर्ड ३/४ ह्याण्डीक्यापको आधारमा खेलाईएको प्रतियोगितामा २५ प्रो सहित कूल १३५ गल्फरले भाग लिएका थिए।

सूर्य नेपाल प्रालिको प्रबन्ध निर्देशक रवि कुमार रायवरम, कर्पोरेट भाईस-प्रेसिडेन्ट रवि केसि, मार्केटिङ्ग भाईस-प्रेसिडेन्ट दिप्रा लाहिरी, फाईन्यान्स भाईस-प्रेसिडेन्ट विकास भत्रा, एनपीजीएका अध्यक्ष रबिन्द्र मान श्रेष्ठ रगोकर्ण गल्फ क्लबका अध्यक्ष सुरिद घिमिरेले पुरस्कार वितरण गरे। 

सुर्य नेपाल गल्फ टुर २०२२-२३ अन्तर्गतको अन्तिम प्रतियोगिता सुर्य नेपाल प्रिमियर गल्फ च्याम्पियनसिप हिजो सकियो। जसको उपाधि १३औं दक्षिण एसियाली खेलकुद सागका दोहोरो स्वर्ण विजेता सुबाश तामाङले जिते। उनले २१-अन्डर २ सय ६७ को सानदार नतिजामा उपाधि जितेका हुन्।