काठमाडौं(हाम्रो खेलकुद) – राष्ट्रिय फुटबल टोलीका फरवार्ड हिसुब थपलिया नेपाल सुपर लिग (एनएसएल) मा साविक विजेता टोली काठमाडौं रेजर्सको मार्की खेलाडीको रुपमा अनुबन्ध भएका छन् ।

दोस्रो संस्करणका लागि काठमाडौंले हिसुबलाई मार्की खेलाडीको रुपमा टोलीमा भित्र्याएको छ । मोरङ अटो वर्क्स इन्टरप्राइजेजको मातहतमा रहेको काठमाडौंले केही समय अगाडि मात्र राष्ट्रिय टोलीबाट डेब्यु गरेका फरवार्ड हिसुबलाई मार्की खेलाडी बनाएको जानकारी दिएको छ ।

गत सिजनको सहिद स्मारक ए डिभिजन लिग उनले जावलाखेल युथ क्लबबाट खेलेका थिए । लिगमा २५ खेलमा उनको चार गोल र चार असिस्ट थियो । लिगपछि राष्ट्रिय टोलीको बन्द प्रशिक्षणमा स्थान बनाउन सफल भएका उनले पहिलो पटक राष्ट्रिय टोलीका लागि भने गत महिना म्यानमारविरुद्ध डेब्यु गरेका थिए ।

काठमाडौंले पहिलो संस्करणमा गोलरक्षक विकेश कुथुलाई मार्की खेलाडी बनाएको थियो । पहिलो संस्करणमा काठमाडौंले धनगढी एफसीलाई फाइनलमा १-० ले हराउँदै उपाधि जितेको थियो । पहिलो संस्करणको एनएसएल कोभिड(१९ को महामारीका कारण दर्शक बिना खेलिएको थियो।

यसअघि धनगढीले आशिष चौधरी, बुटवलले एरिक विष्ट, एफसी चितवनले विशाल श्रेष्ठ, झापाले अन्जन विष्ट, ललितपुरले अनन्त तामाङ, वीरगन्जले दिप कार्की र स्पोर्टिङ इलाम डे मेचीले विकेश कुथुलाई मार्की खेलाडी सार्वजनिक गरि सकेका छन् । एनएसएलको अक्सन शनिबार काठमाडौंमा हुँदैछ ।