एजेन्सी – कतारमा जारी एएफसी एसियन कपको नकआउट चरणको समीकरण पुरा भएको छ । समूह चरणका अन्तिम खेलहरु बिहीबार सकिएपछि नकआउट चरणको खेल तालिका टुंगो लागेको छ ।

समूह एफ अन्तर्गतका अन्तिम दुबै खेल बराबरीमा सकिएका छन् । अन्तिम खेल अगावै अन्तिम १६ मा आफ्नो स्थान बनाएको साउदी अरेबिया र थाईल्याण्डले गोलरहित बराबरी खेले । यो बराबरी संगै थाईल्याण्ड पनि समूह उपविजेता बन्दै नकआउटमा आफ्नो स्थान पक्का गरेको छ । 

ओमान र कीर्गिस्तान बीचको अर्को खेल १-१ को बराबरीमा सकिएसँगै ओमानको यात्रा भने टुंगिएको छ । आज जित हासिल गरेको भए ओमान उत्कृष्ट चार तेस्रो स्थान हासिल गर्ने टोली मध्य एक बन्दै अन्तिम १६ मा आफ्नो स्थान पक्का गर्ने थियो । तर ओमान बराबरीमा रोकिएपछि इन्डोनेसिया इतिहासमा पहिलो पटक अन्तिम १६ मा छनोट भएको छ ।

समुहमा साउदीले ७ अंक हासिल गर्दा थाइल्याण्डले ५, ओमानले २ र किर्गिस्तानले १ अंक हासिल गरे ।   

अब अन्तिम १६ का खेलहरु यसप्रकार रहेका छन् : 

ताजिकिस्तान विरुद्ध युएइ 

इराक विरुद्ध जोर्डन

अस्ट्रेलिया विरुद्ध इन्डोनेसिया

साउदी अरेबिया विरुद्ध दक्षिण कोरिया

उज्बेकिस्तान विरुद्ध थाइल्याण्ड

कतार विरुद्ध प्यालेस्टाइन

बहराइन विरुद्ध जापान

इरान विरुद्ध सिरिया