काठमाडौं (हाम्रो खेलकुद) – गण्डकी प्रदेश तथा स्याङ्जा जिल्लाका महत्वपूर्ण भलिबल खेलाडी स्वर्गीय सन्तोष थापा मगरको स्मृतिमा आमन्त्रित जिल्ला स्तरीय पुरुष भलिबल प्रतियोगिता आयोजना हुने भएको छ ।

दोस्रो चापाकोट महोत्सव अन्तरगत फागुन ८ देखि १३ गतेसम्म स्व. सन्तोष थापा स्मृति कप आमन्त्रित जिल्ला स्तरीय पुरुष भलिबल प्रतियोगिता आयोजना गर्न लागिएको राजन दर्लामी मगरले जानकारी गराए ।

प्रतियोगिता चापाकोट नगरपालिका वडा नम्वर ९ मा रहेको गंगालाल माविको खेलमैदान सुन्तलीटार स्याङ्जामा हुनेछ । चापाकोट महोत्सव फागुन ३ गतेबाट शुरु भइसकेको छ । महोत्सवको अन्तिम दिन नै प्रतियोगिताको फाइनल हुनेछ ।

प्रतियोगितामा सहभागिताको लागि शुल्क लाग्ने छैन । खेलाडीलाई खाना र बस्नको लागि व्यवस्था गरिएको छ । प्रतियोगितामा स्याङ्जा, बागलुङ, नवलपुर, पर्वत, तनहुँ, म्याग्दी, कास्की, गोरखा, पाल्पा, रुपन्देही र गुल्मी जिल्लाको सहभागिता रहनेछ ।

प्रतियोगिताको विजेताले १ लाख ५० हजार रुपैया, ट्रफी, मेडल र प्रमाणपत्र प्राप्त गर्नेछ । दोस्रो हुनेले १ लाख रुपैया, ट्रफी, मेडल र प्रमाणपत्र प्राप्त गर्नेछ । तेस्रो हुनेलाई ५० हजार रुपैया, ट्रफी, मेडल र प्रमाणपत्र प्रदान गरिनेछ ।

सर्वाेत्कृष्ट खेलाडीलाई ५ हजार रुपैयाँ, ट्रफी, मेडल र प्रमाण प्राप्त गर्नेछ । व्यक्तिगत विधाका स्पाइकर, ब्लकर, सेटर, सर्भर, लिवेरो र प्रशिक्षकलाई जनही ३ हजार रुपैयाँ, ट्रफी, मेडल र प्रमाण प्रदान गरिनेछ ।

चापाकोट उद्योग वाणिज्य संघ आयोजक रहेको प्रतियोगितामा चापाकोट नगरपालिका संरक्षक रहेको छ । यस्तै नगर खेलकुद विकास समिति चापाकोटले व्यवस्थापन गरेको छ । गण्डकी प्रदेश भलिबल संघ र जिल्ला भलिबल संघ स्याङ्जाले समन्वय गरेको छ ।

अलराउन्डर २२ वर्षीय सन्तोषको गत कार्तिक २९ गते राति स्थानिय भलिबल प्रतियोगितामा भाग लिएर फर्कने क्रममा स्याङ्जा चापाकोट नगरपालिका २ धुर्कोट र वडा नम्वर ८ दुर्दाङमा मोटरसाइकल दुर्घटनमा परेर निधन भएको थियो ।

पछिल्लो समय सन्तोष विभागीय नेपाल एपिएफ क्लबबाट खेल्दै आएका थिए । उनले एपिएफबाट एनभिए कप, लामाचौर र किङ्स कप खेलेका थिए । सन्तोषले गतवर्ष नवौं राष्ट्रिय खेलकुद तथा टाइगर कपको तीनै संस्करणलगायत विभिन्न प्रतियोगिता गण्डकी प्रदेशबाट खेलेका थिए । सन्तोषका बुवा, आमा र श्रीमती छन् ।