काठमाडौं (हाम्रो खेलकुद) – जिल्ला भलिबल संघ बागलुङले सन्तोष थापा स्मृति कप आमन्त्रित जिल्ला स्तरीय पुरुष भलिबल प्रतियोगिताको उपाधि जितेको छ ।

आइतबार भएको फाइनलमा जिल्ला भलिबल संघ स्याङ्जालाई ३–१ को सेटमा पराजित गर्दै उपाधि जित्न सफल भएको हो । बागलुङले सुरुवाती सेट गुमाएपनि त्यसपछिको तीन सेट आफ्नो पक्षमा पार्दै उपाधि हत्याउन सफल भयो ।

चापाकोट नगरपालिका वडा नम्वर ९ सुन्तली टारमा रहेको गंगालाल माविको खेल मैदानमा भएको खेलको प्रतिस्पर्धात्मक पहिलो सेट २५–२७ ले गुमाएको बागलुङले त्यसपछिको तीन सेट क्रमश २५–२०, २५–२१ र २५–२१ ले आफ्नो पक्षमा पार्न सफल भयो । तेस्रो सेटमा बागलुङले पछि परेको स्थिति उल्ट्याएर जित निकाल्न सफल भएको हो ।

उपाधिसँगै बागलुङले १ लाख ५० हजार रुपैया, ट्रफी, मेडल र प्रमाणपत्र प्राप्त गरेको छ । दोस्रो भएको स्याङ्जाले १ लाख रुपैया, ट्रफी, मेडल र प्रमाणपत्र प्राप्त गरेको छ ।

तेस्रो भएको जिल्ला भलिबल संघ पर्वतले ५० हजार रुपैया, ट्रफी, मेडल र प्रमाणपत्र हात पारेको छ । आइतबारै पर्वतले जिल्ला भलिबल संघ नवलपुरलाई २५–१८, २५–२३ र २५–१७ को सेटमा पराजित गर्दै तेस्रो स्थान हासिल गरेको थियो ।

दोस्रो चापाकोट महोत्सव अन्तरगत गण्डकी प्रदेश तथा स्याङ्जा जिल्लाका महत्वपूर्ण भलिबल खेलाडी स्वर्गीय सन्तोष थापा मगरको स्मृतिमा चापाकोट उद्योग वाणिज्य संघले प्रतियोगिताको आयोजना गरेको हो ।

चापाकोट नगरपालिका संरक्षक र नगर खेलकुद विकास समिति चापाकोटले व्यवस्थापन गरेको प्रतियोगितालाई गण्डकी प्रदेश भलिबल संघ र जिल्ला भलिबल संघ स्याङ्जाले समन्वय गरेको थियो ।

अलराउन्डर २२ वर्षीय सन्तोषको गत कार्तिक २९ गते राति स्थानिय भलिबल प्रतियोगितामा भाग लिएर फर्कने क्रममा स्याङ्जा चापाकोट नगरपालिका २ धुर्कोट र वडा नम्वर ८ दुर्दाङमा मोटरसाइकल दुर्घटनमा परेर निधन भएको थियो ।

पछिल्लो समय सन्तोष विभागीय नेपाल एपिएफ क्लबबाट खेल्दै आएका थिए । उनले एपिएफबाट एनभिए कप, लामाचौर र किङ्स कप खेलेका थिए । सन्तोषले गतवर्ष नवौं राष्ट्रिय खेलकुद तथा टाइगर कपको तीनै संस्करणलगायत विभिन्न प्रतियोगिता गण्डकी प्रदेशबाट खेलेका थिए । सन्तोषका बुवा, आमा र श्रीमती छन् ।

सर्वाेत्कृष्ट खेलाडीलाई ५ हजार रुपैयाँ, ट्रफी, मेडल र प्रमाण प्राप्त गर्नेछ । व्यक्तिगत विधाका स्पाइकर, ब्लकर, सेटर, सर्भर, लिवेरो र प्रशिक्षकलाई जनही ३ हजार रुपैयाँ, ट्रफी, मेडल र प्रमाण प्रदान गरिनेछ ।

फागुन ८ देखि सुरु भएको प्रतियोगितामा कास्की, पर्वत, तनहुँ, स्याङ्जा, नवलपुर, पाल्पा र बागलुङ गरी सात टोलीको सहभागिता रहेको थियो ।