काठमाडौं (हाम्रो खेलकुद) – नेपाली फुटबल टोलीका पूर्व कप्तान हरि खड्का टिप-टो स्पोर्ट्स एकेडेमीको ब्रान्ड एम्बासेडर र प्राविधिक सल्लाहकार (टेकनिकल एडभाईजर) नियुक्त भएका छन् ।

एन्फाका वर्तमान टेक्निकल डाइरेक्टर तथा नेपाली महिला फुटबल टोलीका पूर्व मुख्य प्रशिक्षक समेत रहेका खड्का हाल टिप-टो स्पोर्ट्स एकेडेमीसँग जोडिएका हुन् । 

नेपाली फुटसल टोलीका मुख्य प्रशिक्षक गौरव बस्नेतद्वारा संचालित उक्त एकेडेमीसँग आफु जोडिन पाएकोमा खड्काले संचालक गौरव बस्नेत तथा एकेडेमीका स्पोर्ट्स एडभाईजर सुबास न्यौपानेलाई धन्यवाद दिएका छन् । 

एकेडेमीको प्रशिक्षण केन्द्रमा भएको कार्यक्रममा बीच खड्काले भने, ‘म टिप–टो स्पोर्ट्स एकेडेमीसँग आबद्ध हुन पाउँदा धेरै खुशी छु किनकि म एकेडेमी खेलको जग हो भन्नेमा दृढ विश्वास गर्छु ।’ 

‘ग्रासरुट लेभलबाट अन्तर्राष्ट्रिय स्तरमा नेपालको प्रतिनिधित्व गर्न सक्ने भविष्यका खेलाडीहरू विकास गर्न टिप–टो धेरै समर्पित भएकोमा म खुसी छु’, खड्काले थपे । 

खड्काको विशेषज्ञता र अनुभवका कारण नै उनलाई एकेडेमीसँग जोडिएको संचालक बस्नेतले बताए । ‘उहाँको विशेषज्ञता र अनुभवले एकेडेमीलाई भविष्यका खेलाडीहरू विकास गर्न एकेडेमीले स्थापित गरेको कोसेढुङ्गामा पुग्न निश्चित रूपमा मद्दत गर्नेछ’, बस्नेतले भने । 

टिप-टो स्पोर्ट्स एकेडेमी २०२१ मा स्थापित भएको थियो ।