काठमाडौं (हाम्रो खेलकुद) – काठमाडौं म्याराथनको १६औं संस्करण अर्काे साता भएको छ । आयाेजकले शनिबार राजधानीमा पत्रकार सम्मेलनमार्फत १६औं संस्करणकाे काठमाडौं म्याराथन १२ असोज (२०२४ सेप्टेम्बर २८) मा हुने जानकारी गराएकाे छ ।

काठमाडौं म्याराथनको सुरुआत सन् २००७ मा भएको थियाे । विशेष र वृहत हुने यसपालीकाे दाैडमा १६ देशका ६६ अन्तर्राष्ट्रिय धावकसँगै कुल तीन हजार भन्दा बढीको सहभागिता रहनेछ ।

म्याराथनमा १ सय ७० ले सहभागिताका लागि नाम दर्ता गरेका छन् । त्यस्तै हाफ म्याराथन ५ सय ५० ले नाम दर्ता गरेका छन् । सरकारी र निजी गरेर ६० भन्दा बढी विद्यालयका छात्र छात्राले पाँच किलोमिटर दौड र तीन किलोमिटर खुल्ला दौडमा सहभागिता जनाउने छन् । फेमिली रनमा १९ परिवारको सहभागिता रहने आयाेजकले जनाएकाे छ।

काठमाडौं म्याराथनका मुख्य आयोजक निलेन्द्रराज श्रेष्ठले दौडका बेला ट्राफिक व्यवस्थापन नै सबैभन्दा ठूलो चुनौती रहेको बताए । उनले दौडका बेला ट्राफिक व्यवस्थापनका लागि सम्बन्धित निकायसँग छलफल भइरहेको पनि बनाए ।

उनका अनुसार दौडको सुचारु सञ्चालनका लागि बाटोको एक भागलाई बन्द गर्ने तथा धावक धाविकाको पूर्ण सुरक्षा र दुर्घटनाको न्युनिकरणका लागि सबै प्रयास गरिनेछ । उनले भने, ‘मलाई पूरा विश्वास छ, ट्राफिक व्यवस्थापन निकायले दौडका बेला चाहिने सबै जिम्मेवारी गम्भीर भएर पूरा गर्नेछ र खेल सहरका रूपमा काठमाडौंको छवि कायम राख्न मदत पुग्नेछ ।’

उनले सटिक ट्राफिक व्यवस्थापनले खेलाडीलाई मात्र सजिलो हुने नभएर सहरको छवि ब्रान्डिङ तथा पर्यटन विकासमा पनि सहयोग पुग्नेछ । म्याराथन र हाफ म्याराथन दौडमा इलेक्ट्रिक टाइमिङ प्रयोग हुनेछ । यसले धावक धाविकालाई अन्य अन्तर्राष्ट्रिय प्रतियोगितामा छनोटका लागि पनि सहयोग पुग्नेछ ।

दौडमा चार सय भन्दा बढी स्वंय सेवक तथा खेल टेक्निकल अफिसियलको सहभागिता रहनेछ । हाफ म्याराथनमा पहिलो पटक पेसर्सको पनि प्रयोग गरिनेछ । यसका लागि बंगलादेश र भारतबाट विज्ञहरू नेपाल आइपुगिसकेका छन् ।

म्याराथन र हाफ म्याराथनको दौड त्रिपुरेश्वरबाट बिहान ठीक ५.१० बजे सुरु हुनेछ । त्यसबेला प्रयोग हुने रुटमा त्यस दिन पाँच घण्टाका लागि सकेसम्म आफ्नो सवारी साधन त्यस रुटमा प्रयोग नगरिदिन आयाेजकले काठमाडौंबासीलाई अनुरोध गरेकाे छ ।

प्रमुख आयोजक श्रेष्ठले दौडका प्रमुख साझेदार र सहयोगी नेपाल एथलेटिक्स संघ, राष्ट्रिय खेलकुद परिषद र नेपाल ओलम्पिक कमिटी लगायत पत्रकार, निर्णायक, स्वंय सेवक, प्रायोजकलाई धन्यवाद व्यक्त गरे ।

दौडको कार्यत्रम सफलतापूर्वक सञ्चालन गर्न सहयोग गर्दै आएको ‘योर फेस बाई इन ड्राइभ’ लाई पनि विशेष धन्यवाद दिनु पर्ने हुन्छ । एनआरएस स्पोर्टस फाउन्डेसनले इन ड्राइभसँगको सहकार्यमा ‘योर पेस किप फिट सर्किट’ आठ सहरमा नियमित रूपमा विगत एक वर्षदेखि दौडको निः शुल्क प्रशिक्षण दिंदै आएको छ ।

सोही समूहबाट ४ सय ५० विद्यार्थीहरूले पनि काठमाडौं म्याराथनमा सहभागिता जनाउने छन् । अन्त्यमा प्रमुख आयोजक श्रेष्ठले दौडका क्रममा सहभागी हुनेलाई प्रोत्साहन गर्न सबै काठमाडौंबासीलाई सडकमा उत्रेर हौसलना प्रदान गर्न पनि आह्वान गरेका छन् ।

उनले भने, ‘यो दौडको सफल आयोजनाका लागि सबैको सहयोग आवश्यक छ । खेलकुदको माध्यमबाट पर्यटनको प्रवर्द्धनका लागि हामीले सकारात्मक सन्देश पनि दिन सक्छौं ।’