काठमाडौं (हाम्रो खेलकुद) – तीन नेपाली खेलाडीले आइतबारबाट जापानको सापोरामा सुरु हुने आठौं एसियाली हिउँदे खेलकुद (एसियन विन्टर गेम्स) मा प्रतिस्पर्धा गर्दैैछन् । मनिकला राईले क्रस कन्ट्री तथा संगिता लामा र सफलराम श्रेष्ठले अल्पाई स्कीमा भाग लिनेछन् ।

आठ सदस्यीय नेपाल टोलीमा नेपाल ओलम्पिक कमिटी (एनओसी) का सदस्य तेजबहादुर गुरुङ सेफ द मिसनका रुपमा रहेका छन् ।

मार्सल र ओशाम किमुरा नेपाली खेलाडीको प्रशिक्षकका रुपमा जापान गएका छन् भने नेपाल ब्याडमिन्टन संघका महासचिव वीरेन्द्र श्रेष्ठ र एनओसी सदस्य समिम मियाँ अन्सारी अफिसियलका रुपमा टोलीमा रहेका छन् ।

एनओसी अध्यक्ष जीवन राम श्रेष्ठ, महासचिव लामा टेन्डी शेर्पा र राष्ट्रिय खेलकुद परिषदका सदस्य सचिव केशब कुमार विष्ट पनि टोलीसँगै शुक्रबार जापान प्रस्थान गरेका छन् ।