दिल तामाङ, सिड्नी

ढोरपाटन क्लब अस्ट्रेलिया र म्याग्दी काली युनाइटेडले नेपाली समूदायबिचको आठौं संस्करणको महिला र पुरुष भलिबल च्याम्पियनसिपको उपाधि जितेका छन् । ढोरपाटन पुरुषतर्फ र म्याग्दी काली महिलातर्फ च्याम्पियन बनेको हो ।

दुई महिनाअघि भएको च्याम्पियनसिपमा पनि यि दुई टोली नै च्याम्पियन बनेका थिए । यि दुई टोलीले यसपटक पनि आफ्नो विरासतलाई कायम राख्न सफल भए ।

अस्ट्रेलियाको सिड्नीस्थित अवर्न बास्केटबल सेन्टर लिडकममा आइतवार भएको एक दिने प्रतियोगिताको पुरुषतर्फ रोमाञ्चक र प्रतिस्पर्धात्मक बनेको फाइनलमा नेपाली पुरुष राष्ट्रिय टोलीका सदस्य रहिसकेका स्पाइकर राजेन्द्र विष्ट सम्मिलित ढोरपाटनले राष्ट्रिय टोलीकै सदस्य रहिसकेका दिल बहादुर सुनारसम्मिलित गल्कोट समाज अस्ट्रेलियालाई ३-२ को सेटमा पराजित गर्दै उपाधि हात पारेको हो ।

पहिलो सेट २३-२५ ले गुमाएको ढोरपाटनले त्यसपछि दुई सेट २५-१८, २५-१९ ले जित्दा चौथो सेट २१-२५ ले गुमाउँदा खेल पाँचौं सेटमा लम्बियो । पाँचौं सेटको सुरुवातमै गल्कोटले ४-० को अग्रता बनाएपनि त्यसलाई जोगाउन सकेन ।

राजेन्द्र विष्टको उच्च प्रदर्शनमा ढोरपाटनले लगातार ६ अंक बटुल्दा खेल ६-४ को स्थितिमा पुग्यो । त्यही अग्रतालाई कायम राख्दै ढोरपाटनले १५-१२ ले सेट आफ्नो पक्षमा पार्दै उपाधि जित्न सफल भयो ।

महिलामा आयोजक म्याग्दी जलजला परिवार अस्ट्रेलियालाई ३-० को सोझो सेटमा पराजित गर्दै म्याग्दी काली युनाइटेड च्याम्पियन बन्न सफल भयो ।

महिला राष्ट्रिय टोलीकी कप्तान अरुणा शाहीसम्मिलित जलजलालाई पराजित गर्न नेपाली महिला राष्ट्रिय टोलीकी सदस्य सरस्वती चौधरीले सानदार प्रदर्शन गरिन् । म्याग्दी कालीले २५-१९ २५-१९ र २५-१९ को सोझो सेटमा जित निकाल्यो ।

पुरुषतर्फ विजेता बनेको ढोरपाटनले ३ हजार १ सय ५ अस्ट्रेलियन डलरसहित शिल्ड मेडल र प्रमाणपत्र प्राप्त गरेको छ । दोस्रो भएको गल्कोटले १ हजार ८ सय ५ अस्ट्रेलियन डलरसहित शिल्ड मेडल र प्रमाणपत्र पायो ।

महिलातर्फको विजेता म्याग्दी कालीले १ हजार २ सय ५ अस्ट्रेलियन डलरसहित शिल्ड मेडल र प्रमाणपत्र प्राप्त गर्दा दोस्रो भएको जलजलाले ७ सय ५ अस्ट्रेलियन डलरसहित शिल्ड मेडल र प्रमाणपत्र प्राप्त गरेको छ ।

पुरुषतर्फ ढोरपाटनका राजेन्द्र विष्ट र महिलामा जलजलाकी अरुणा शाही सर्वाेत्कृष्ट खेलाडी घोषित भइन् । उनीहरुले ट्रफी प्राप्त गरे ।

यस्तै पुरुषतर्फ गल्कोटका दिल बहादुर सुनार उत्कृष्ट स्पाइकर, ढोरपाटनका खेम पुर्जा सेटर, गल्कोटका अर्जुन ब्लकर र गल्कोटकै विशाल विक उत्कृष्ट लिवेरो चुनिए ।

महिलामा म्याग्दी कालीकी सरस्वती चौधरी उत्कृष्ट स्पाइकर, म्याग्दी कालीकी मिया पुन सर्भर र जलजलाकी मनिषा पुन लिवेरो चुनिइन् । उनीहरुले नगद र ट्रफी प्राप्त गरे ।

प्रतियोगिता दौरान नै जलजलाले राष्ट्रिय टोलीबाट खेलिसकेका खेलाडीलाई सम्मानित गरेको छ । जलजलाले नेपाली राष्ट्रिय महिला टोलीकी कप्तान अरुणा शाही, स्पाइकर सरस्वती चौधरी र प्रतिभा माली तथा पुरुषतर्फ पुर्व कप्तान मानबहादुर श्रेष्ठ, टेकराज अवस्थी, बिशाल बहादुर बिक, राजेन्द्र विष्ट, दिल बहादुर सुनार, राजु शेरचनलाई सम्मानित गरेका हुन् ।

एक दिने च्याम्पियनसिपमा पुरुषतर्फ १३ र महिलातर्फ ६ टोलीको सहभागिता रहेको थियो । च्याम्पियनसिपलाई स्टुडेन्ट भाइब्स एजुकेशन एण्ड भिजा सर्भिसेसले मुख्य प्रायोजन गरेको थियो । धुरसन कन्ट्रक्सन, डिबि मार्ट र लुम्बिनी ग्रोसरी एण्ड मिट प्लाटिनियम स्पोन्सर रहेका थिए ।