सिड्नी (हाम्रो खेलकुद) – अष्ट्रेलियाको सिड्नीमा अर्काे महिना दोस्रो संस्करणको अजी फाइनान्स अन्तर्राष्ट्रिय पुरुष भलिबल कप २०२५ आयोजना हुने भएको छ ।

दि गोर्खा स्पोट्र्स क्लबको आयोजनामा आगामी माघ १३ गते आइतबार (२६ जनवरी) मा दोस्रो संस्करणको अन्तर्राष्ट्रिय पुरुष भलिबल कपसँगै ३५ वर्षमाथिको पुरुष भलिबल कप आयोजना हुने भएको हो । एक दिने प्रतियोगिता अष्ट्रेलियाको लिडकमस्थित ओवर्न बास्केटबल सेन्टरमा हुनेछ ।

प्रतियोगितामा खुल्लातर्फ कम्तीमा १४ टोली र ३५ वर्षमाथि ६ टोलीको सहभागिता रहने र खेलहरु नकआउटका आधारमा सञ्चालन हुने प्रतियोगिता संयोजक प्रकाश फाल मगरले जानकारी गराए । खुल्लातर्फ एक टोलीमा नेपालको राष्ट्रिय टोलीबाट प्रतिनिधित्व गरेका एक जना मात्र खेल्न पाउने प्रावधान छ ।

प्रतियोगिताको विजेताले ३ हजार १ सय ५५ अष्ट्रेलियन डलरसँगै कप मेडल र प्रमाणपत्र प्राप्त गर्नेछ । दोस्रो हुनेले १ हजार ८ सय ५५ अष्ट्रेलियन डलरसँगै कप मेडल र प्रमाणपत्र प्रदान गरिने आयोजकले जनाएको छ । ३५ वर्षमाथिको विजेताले १ हजार ५५ अष्ट्रेलियन डलरसँगै कप मेडल र प्रमाणपत्र तथा दोस्रो हुनेले ५ सय ५५ अष्ट्रेलियन डलरसँगै कप मेडल र प्रमाणपत्र प्राप्त गर्नेछ ।

सर्वाेत्कृष्ट खेलाडी र व्यक्तिगत विधातर्फको विजेतालाई नगद र ट्रफीको व्यवस्था रहेको क्लबका अध्यक्ष दिपेन्द्र राईले बताए । प्रतियोगितामा सहभागिताको लागि खुल्लातर्फ ३ सय ७५ तथा ३५ वर्षमाथि ३ सय डलर शुल्क तोकिएको छ ।

यस प्रतियोगितालाई अजी फाइनान्स एण्ड होम लोनले मुख्य प्रायोजन गरेको छ । एक्सपर्ट एजुकेसन एण्ड भिज सर्भिसेस, रे पोपर्टी र फिस एट दि रक्स प्लाटिनम प्रायोजक रहेका छन् । गत वर्ष आयोजक गोर्खाले नै उपाधि जितेको थियो ।