काठमाडौं(हाम्रो खेलकुद) – नेपाली युवा अलराउण्डर कुशल मल्ल सम्मिलित डेजर्ट भाइपर्सले अन्तर्राष्ट्रिय लिग (आईएल) टि ट्वान्टीमा दीपेन्द्रसिंह ऐरीआबद्ध गल्फ जायन्ट्सलाई पराजित गरेको छ ।

डेजर्टले बुधवार भएको खेलमा गल्फलाई ५ विकेटले पराजित गरेको हो । डेजर्ट विजयी खेलमा कुशल र दीपेन्द्रले भने मौका पाएका थिएनन् । १ सय ३० रनको सामान्य लक्ष्य डेजर्टले १९ ओभरमा ५ विकेट गमाएर पूरा गर्यो ।

डेजर्टको जितमा म्याक्स होल्डेनले नट आउट रहँदै सर्वाधिक ७० रन जोडे । उनले ५४ बलमा ९ चौका र १ छक्का प्रहार गरे । फखर जमान १४ तथा साम करन १६ रनमा आउट भए । गल्फका लागि ब्लेसिंग मुजवानीले ३ तथा क्रिस जोर्डन र मार्क अडिरले समान १ विकेट लिए ।

त्यसअघि दुवई क्रिकेट स्टेडियममा टस हारेर गल्फले ब्याटिङ निम्तो पाएको थियो । गल्फले निधर्नरित २० ओभरमा ८ विकेट गुमाएर १ सय २९ रनको योगफल तयार गरेको थियो ।

गल्फका लागि टोम करनले नट आउट रहँदै सर्वाधिक ६४ रन जोडे । उनले ३४ बलमा ९ चौका र १ छक्का प्रहार गरेका थिए । टोम अल्सप १७ तथा कप्तान जेम्स भिन्स १५ रनमा आउट भए । डेजर्टका साम करन र वानिन्दु हसरंगाले समान ३ तथा खुजैमा तन्भिर र कप्तान लकि फर्गुसनले समान १ विकेट लिए ।

जितसँगै डेजर्ट ९ खेलमा १४ अंकका साथ शीर्ष स्थानमा छ । गल्फ ८ खेलमा ६ अंकका साथ पाँचौ स्थानमा छ ।