काठमाडौं (हाम्रो खेलकुद)- प्रमुख दाबेदार निरज तामाङलाई एक स्ट्रोकले हराउँदै अनुभवी तोरण विक्रम शाही सूर्य नेपाल एनपिजिए टुर च्याम्पियनसिपको उपाधि जित्न सफल भएका छन्।

घरेलु टुरमा तोरणले १२ वर्षपछि उपाधि जितेका हुन्। ५-अन्डर ६७ को स्कोरमा समग्रमा १८-अन्डर २७० सहित उनले निरजलाई रोमाञ्चक शैलीमा माथ दिए।

यसअघि उनले सन् २०१३ मा यही च्याम्पियनसिप जितेका थिए। उनको करियरको यो तेस्रो उपाधि हो। सन् २००७ मा करियरको पहिलो उपाधि कैलाश टी ओपन जितेका थिए। आज उपाधिसँगै उनले १ लाख ५० हजार रुपैयाँ प्राप्त गरे।

यो सिजन लगातार दुई प्रतियोगिता जितेका निरज र अन्तिम १८ होलको सुरुवात गर्दा एक स्ट्रोकले अगाडि रहेका तोरणबीच कडा प्रतिस्पर्धा हुने अनुमान गरिएको थियो। सोही अनुरूप १८ होल सम्म नै निरजले तोरणलाई दबाब दिए।‌

तोरणले तेस्रो देखि पाँचौं होलमा लगातार तीन बर्डी प्रहार गर्दै उत्कृष्ट सुरूवात गरे। पाँचौं होलमा त उनी इगलको लागि केहि इन्चले चुके।

यता निरजले पनि चौथो र नवौं होलमा एक-एक सट बचाए। तोरणले फ्रन्ट नाइन ३-अन्डरमा र निरजले २-अन्डरमा सकाए। फ्रन्ट नाइनको समाप्तीमा तोरण २ स्ट्रोकले अग्रता बनाए।

यसपछि तोरणले १० औं होलमा एक सट बचाउँदा अग्रता ३ स्ट्रोकमा पुर्याउँदै जिततर्फ अगाडि बढिसकेका थिए। तर निरजले हार मानेनन्। ११ औं होलमा दुवैले बर्डी प्रहार गरे। यसपछि निरजले १४ औं र १५ औं होलमा लगातार दुई बर्डी प्रहार गरेर तोरणलाई कडा चुनौती दिए।

तोरणको अग्रता एक स्ट्रोकमा झर्यो। तर लगतै १६औं होलमा बोगी प्रहार गर्नु निरजको लागि महङ्गो साबित भयो। उनी फेरि २ स्ट्रोकले पछि परे। लगातार यो सिजन तेस्रो उपाधि जित्ने दाउमा रहेका निरजले सो बोगी बिर्सदै १७ औं होलमा दिनको छैटौं बर्डी दर्ज गरे।

अब अन्तिम होलमा बर्डी प्रहार गरेको खण्डमा निरजले खेललाई प्ले अफसम्म पुर्याउण सक्थे। तर निरज र तोरण दुवैले १८ औं होलमा पार खेले। यो सँगै एक स्ट्रोकको अग्रता नै तोरणलाई उपाधिको लागि प्रयाप्त भयो।

तोरणले जस्तै ५-अन्डर ६७ को उत्कृष्ट स्कोरका बाबजुद समग्रमा १७-अन्डर २७१ सहित निरजले दोस्रो स्थानमा चित बुझाए। उनले नगद १ लाख हात पारे। यसअघि इस्टर्न ओपन र वेस्टर्न ओपन जितेका उनले लागातार तेस्रो उपाधि जित्ने मौका चुकाए।

नेपाल नम्वर एक एमेच्योर गल्फर सदभाव आचार्यले आज दिनकै उत्कृष्ट ७-अन्डर ६५ को स्कोर निकाले। समग्रमा १३-अन्डर २७५ सहित तेस्रो भए। बोगी फ्री स्कोर कार्ड बनाएका उनले सात बर्डी प्रहार गरे। यो स्कोरमा उनले एमेच्योरतर्फको उपाधि जिते। उनले राहुल विश्वकर्मालाई ९ स्ट्रोकको फराकिलो अन्तरना माथ दिए।

३-अन्डर ६९ स्कोर गर्दै समग्रमा ५-अन्डर २८३ सहित सञ्जय लामा चौथो भए। प्रो तर्फ तेस्रो हुँदै उनले ७५ हजार प्राप्त गरे। एमेच्योर राहुल समग्रमा पाँचौं भए। राहुले आज २-ओभर ७४ स्कोर जोडे। समग्रमा ४-अन्डर २८४ को स्कोर निकाले। एमेच्योरतर्फ उनी दोस्रो भए।

प्रतियोगिताका विजयी खेलाडीहरुलाई सूर्य नेपाल प्रालिका सिनियर ब्रान्ड म्यानेजर विदुर राज अधिकारी र नेपाल प्रोफेसनल गल्फ एसोसिएसन (एनपिजिए) का अध्यक्ष रवीन्द्र मान श्रेष्ठले पुरस्कार वितरण गरे।

चार दिने प्रतियोगिताको कुल पुरस्कार राशी ८ लाख ८२ हजार रुपैयाँ रहेको थियो। प्रतियोगितामा ३० प्रो र ९ एमेच्योर गरी कुल ३९ गल्फरले प्रतिस्पर्धा गरेका थिए।