सुमन अधिकारी, बुटवल

आयोजक वेष्ट्रन क्रिकेट एकेडेमीले यु १४ टि ट्वान्टी क्रिकेट प्रतियोगिताको उपाधि जितेको छ ।

देवदह क्रिकेट युनिटलाई सोमवार भएको फाइनलमा १३ रनले पराजित गर्दै वेष्ट्रनले उपाधि जितेको हो ।

नरेश्वर खेल मैदानमा टस जितेर ब्याटिङ गरेको वेष्ट्रनले १४.१ ओभरमा सबै बिकेट गुमाएर ५५ रन बनाएको थियो । जसमा एक्स्ट्रा रन नै २० थियो ।

उसका लागि केशव रायमाझीले २० बलमा १५ रनबाहेक अन्य ब्याटरले दोहोरो अंकको रन जोड्न सकेनन् । देवदहका प्रिन्स शर्माले ४ र रोहित कुवरले ३ विकेट लिएका थिए ।

५६ रनको झिनो विजय लक्ष्य पछ्याएको देवदहले सुरुवात राम्रो गर्न सकेन । देवदहले १६.४ ओभरमा सबै विकेट गुमाएर ४१ रन मात्र बनाउन सक्यो।

देवदहका रोजन काफ्ले र सुसान्त बिकले समान १५ रन जोडका थिए । देवदहले ९ ओभरमा ६ विकेटको क्षतिमा ९ रन मात्र बनाएको थियो ।

वेष्ट्रनका लागि सुप्रिम कंडेलले ४ र निश्चल पौडेलले ३ विकेट लिए । खेलमा सुप्रिम कंडेल प्लेयर अफ दी म्याचबाट पुरस्कृत भए ।

गार्गीका अनमोल पुन सर्वोत्कृष्ट खेलाडी घोषित भए । वेष्ट्रनका सुप्रिम कंडेल म्यान अफ ली सिरिज घोषित भए र उनले ट्रफीसहित ५ हजार रुपैयाँ प्राप्त गरे ।

देवदहका रोहित कुवर उत्कृष्ट ब्याटर र बेष्ट्रनका सम्राट पोखरेल उत्कृष्ट बलर चुनिए। उपाधिसंगै वेष्ट्रन ४१ हजार र देवदले २१ हजार रुपैयाँ प्राप्त गर्यो ।

विजेता तथा उपविजेता टिम एवं खेलाडीहरुलाई बुटवल उपमहानगरपालिकाका उपप्रमुख सावित्रादेवी अर्याल, वडा नं.११ का वडाअध्यक्ष रामचन्द्र क्षेत्री, रुपन्देही क्रिकेट संघका अध्यक्ष हरि बहादुर थापा, लुम्बिनी प्रदेश क्रिकेट संघका अध्यक्ष संजय गुरुङ, क्लबका अध्यक्ष भुवन पाण्डेले पुरस्कार वितरण गरेका थिए ।

प्रतियोगितामा सहभागी १२ वटा टोलीलाई दुई समूह विभाजन गरिएको थियो । राउण्ड रोविनपछि दुई समूहका शीर्षटोलीले फाइनलमा प्रतिस्पर्धा गरेका हुन् ।

एकेडेमीले नियमित रुपमा उमेर समुहको प्रतियोगिता आयोजना गर्दै आएको छ । नेपालका यु–१९ का तत्कालिन कप्तान देव खनाल यसै वेष्ट्रन क्लबका उत्पादन हुन् ।