काठमाडौं (हाम्रो खेलकुद)- सहिद स्मारक ‘बी’ डिभिजन लिगमा ब्याइज युनियन क्लब जित हात पार्न सफल भएको छ। रोमाञ्चक खेलमा श्री कुमारी क्लबलाई ५-३ को हार चखाउन सफल भएको छ।

यो जितमा ब्वाइज युनियनको रेलिगेसनबाट जोगिएको छ। खेलको १९ औं मिनेटमा पाल्देन तामाङको गोलमा श्री कुमारी ले पहिले अग्रता बनायो। तर यो अग्रता धेरै बेर टिकेन।

२४ औं मिनेटमा सुजित बुढाथोकी र ३२ औं मिनेटमा बिनोद राईको गोलमा ब्वाइज युनियन खेलमा फर्कियो। पहिलो हाफमा २-१ को अग्रता कायम गर्यो।

५७ औं मिनेटमा दिव्य विक्रम चौधरीले गोल गरे। यो गोलमा ब्वाइज युनियन ३-१ ले अगाडि बढ्यो। श्री कुमारीका अरुण शाहले ६३ औं मिनेटमा एक गोल फर्काए।

तर ८७ औं मिनेटमा ब्वाइज युनियनको लागि सुशन लामाले गोल गरे। खेलमा ब्वाइज युनियनले ४-२ को अग्रता बनायो।

गोलको वर्षा भएको खेलको ८९ औं मिनेटमा यमन महर्जनले श्री कुमारीको लागि गोल गर्दै गोल अन्तर घटाए। तर इन्जुरी समयमा दिव्य विक्रमले ब्वाइज युनियनको लागि व्यक्तिगत दोस्रो गोल गरे।

यो सँगै ब्वाइज युनियनले ५-३ को जितका साथ महत्वपुर्ण ३ अंक जोड्यो। ११ खेलबाट १९ अंक बनाएको छ। यो सँगै ब्वाइज युनियन रेलिगेसनबाट जोगिने निश्चित भएको छ।

श्री कुमारीसँग मात्र १३ अंक रहेको छ। लिगको १० औं‌ स्थानमा रहेको श्री कुमारी भने रेलिगेसनको खतरामा रहेको छ।