सिड्नी (हाम्रो खेलकुद) – म्याग्दी प्रवासी नेपाली संघ (मोना) अस्ट्रेलियाको आयोजनामा नवौं मोना अस्ट्रेलिया कप भलिबल तथा बास्केटबल प्रतियोगिता अर्काे साता हुने भएको छ ।

दुई दिने प्रतियोगिता लिडकमस्थित ओबर्न बास्केटबल सेन्टरमा जुन ७ र ८ तारिख ( जेठ २४ र २५ गते ) मा हुनेछ । प्रतियोगितामा खुल्ला पुरुष भलिबल, खुल्ला महिला भलिबल, ३५ वर्षमाथिको भेट्रान्स पुरुष भलिबल र पुरुष बास्केटबल हुने बताइएको छ।

खुल्ला पुरुषतर्फ १२ टोलीको सहभागिता रहेको छ । पोल ‘ए’ मा दि गोर्खा स्पोर्ट्स क्लब, म्याग्दी जलजला परिवार अस्ट्रेलिया, ढोरपाटन क्लब अस्ट्रेलिया, पोखरा भलिबल क्लब, इलाइट गोर्खा र पर्वत बेनी रहेका छन् ।

पोल ‘बी’ मा गोल्डेन ब्वाइज भलिबल क्लब, गल्कोट समाज अस्ट्रेलिया, आयोजक मोना अस्ट्रेलिया, थकाली सेवा समिति, छन्त्याल परिवार अस्ट्रेलिया र म्याग्दी काली युनाइटेड रहेका छन् ।

महिलामा ६ टोलीको सहभागिता छ । पोल ‘ए’ मा मोना अस्ट्रेलिया, मंगला समाज र म्याग्दी काली युनाइटेड रहेका छन् । यस्तै पोल ‘बी’ छन्त्याल परिवार, म्याग्दी जलजला र ढोरपाटन रहेका छन् ।

भेट्रान्समा ९ टोलीको सहभागिता रहेको छ । पोल ‘ए’ मा सिड्नी वेस्ट भलिबल क्लब, मोना अस्ट्रेलिया, जलजला परिवार र क्यावेरा भलिबल क्लब तथा पोल ‘बी’ मा छन्त्याल परिवार, ठकुरी भलिबल सिड्नी, बाग्लुङ समाज, दि गोर्खा स्पोर्ट्स क्लब र ढोरपाटन क्लब रहेका छन् ।

यसपटक महिलातर्फको खेलहरु थप रोमाचक हुने तय छ । म्याग्दी काली युनाइटेडबाट प्रतिभा माली वा सरस्वती चौधरीमध्ये एकले खेल्नेछिन् ।

यस्तै पुरुषतर्फ आयोजक मोनाबाट राष्ट्रिय तथा पुलिसका रविन चन्दले खेल्ने पक्का भएको छ । उनले यसअघि गत जनवरीमा माेनाबाट खेल्दै दोस्रो अजी फाइनान्स गोर्खा कप पुरुष तथा भेट्रान्स पुरुष भलिबल प्रतियोगिताकाे च्याम्पियन बनाएकाे थियाे ।

यस्तै जलजलाबाट राष्ट्रिय टोलीका लोकेन्द्र राज गिरीसँगै हेमन्त बहादुर मल्ल र विभागीय नेपाल एपिएप क्लबका रमेश विकले खेल्नेछन् ।

लोकेन्द्र र हेमन्तले जलजलाबाट खेलिसकेका छन् । रमेश प्रतियोगितका लागि अस्ट्रेलिया आइसकेका छन् । रविन यसै साता आइपुग्ने आयोजकले जनाएको छ।

गोर्खाबाट विशाल बहादुर बिक, ढोरपाटनबाट राजेन्द्र विष्ट, गल्कोटबाट दिल बहादुर सुनार, म्याग्दी कालीबाट टेकराज अवस्थी र पर्वत बेनीबाट सम्राट भण्डारीले खेल्नेछन् । राष्ट्रिय टोलीका पूर्व कप्तान मानबहादुर श्रेष्ठले पोखरा भलिबल क्लबको प्रतिनिधित्व गर्नेछन् ।

पुरस्कार राशि खुलाइएको छैन । तर, यो सिड्नीमा भलिबलकै सर्वाधिक पुरस्कार राशि रहने आयोजकले जनाएको छ । गत संस्करणमा खुल्ला पुरुष भलिबलमा छन्त्याल परिवार र महिलामा ढोरपाटनले उपाधि जितेको थियो ।

स्टुडेन्ड भाइब्स एजुकेशन एण्ड भिजा सर्भिसेसले मुख्य प्रायोजन गरेको प्रतियोगितालाई एएलडी कर्पाेरेटले सह प्रायोजन गरेको छ । पावरवाईमा नर्टवेस्ट, तृप्ति फाउन्डेसन, नेपमार्ट, एमटी इको लक्ष्मी होम लोन रहेका छन् ।

यस्तै सहयोगीमा हाम्रो रेमिट, लालटिन नेपाली कजिन, युआइसी पेन्टिङ सर्भिस पिटिआई लिमिटेड, गोर्खा ज्वेलरी, फ्लाइट कनेक्ट, खुकुरी अस्ट्रेलिया, नमस्ते ज्वेलरी, डेली फ्रेस केज र हिमाल एण्ड को बार्बर सप रहेका छन् ।