धनगढी, फागुन २९ धनगढीमा जारी सगरमाथा सिमेन्ट धनगढी क्रिकेट लिग(डिसिएल) सिजन–३ मा क्याम्पस रोडले रोमाञ्चक जित निकाल्दै शीर्ष स्थानमा उक्लिएको छ ।
शनिबार भएको दोस्रो खेलमा क्याम्पसरोडले सन्तोषी टोलमाथि १२ रनको रोमाञ्चक जित निकालेको हो । ४ खेलबाट क्याम्पस रोडको ६ अंक छ । यस्तै दोस्रो स्थानको चौराहाको ४ तथा सन्तोषी टोलको पनि समान चार अंक नै भएपनि नेटरनरेटमा पछि छ ।
टस जितेर पहिले ब्याटिङ गरेको क्याम्पसरोडले पुरै ओभर खेलेर ९ विकेट गुमाएर १ सय ३३ रनको योगफल बनाएको थियो । उसका लागि चन्द्र सावँदले ४१ रनको पारी खेले । रोमन बमले ३७ रन तथा राजन शेरचनले १२ रन जोडे । सन्तोषी टोलका महेश अधिकारी र प्रकाश कार्कीले समान ३ विकेट लिए भने सुनिल धमला र अमित बुढाले १ विकेट लिए ।
जवाफी ब्याटिङमा उत्रेको सन्तोषी टोलले २० ओभरमा ९ विकेट गुमाएर १ सय २१ रन मात्र बनाउन सक्यो । सन्तोषी टोलका लागि कप्तान राजु रिजालले ३२ तथा सुनिल धमलाले २६ रनको पारी खेलेपनि टीमलाई जिताउन सकेन । पुछारका ब्याट्सम्यान महेश अधिकारीले अविजित २२ रनको पारी खेल्दै आशा जगाएपनि अन्य ब्याट्सम्यानले साथ नदिदा पराजित हुन पुग्यो । क्याम्पसरोडका सन्तोष भट्टले ३ विकेट लिए । ललित सिंह भण्डारीले २ विकेट तथा चन्द्र साउँदले १ विकेट लिए ।
