काठमाडौं (हाम्रो खेलकुद) – एभरेस्ट वल्ड क्लास तेक्वान्दो संघ अन्तरगत नेपाल शाखाको आयोजनामा प्रथम एभरेस्ट राष्ट्रिय खुल्ला तेक्वान्दो प्रतियोगिता यसैसाता आयोजना हुने भएको छ ।
आयोजक – एभरेस्ट वल्ड क्लास तेक्वान्दो संघ अन्तरगत नेपाल शाखाले सोमबार राजधानीमा पत्रकार सम्मेलनको आयोजना गर्दै प्रतियोगिता पुस १८ गतेबाट २० गतेसम्म हुने जानकारी गराएको हो ।
प्रतियोगितामा काठमाडौं उपत्यका र उपत्यका बाहिरका गरेर १ हजार २ सय खेलाडीले सहभागिता जनाउने अध्यक्ष केशव थापाले पत्रकार सम्मेलनमा जानकारी गराए ।
प्रतियोगितामा १०० स्वर्णपदक, १०० रजत पदक र २०० कास्य पदकका लागि प्रतिस्पर्धा हुनेछ । प्रतियोगितामा सिनियर, जुनियर, क्यारेट र पुम्सेमा प्रतिस्पर्धा हुनेछ । सिनियरमा महिला र पुरुष तर्फ ८–८ स्वर्णका लागि जुनियरतर्फ महिला र पुरुषमा १५–१५ स्वर्णं, क्यारेट यु–१४मा १५–१५ स्वर्ण र पुम्सेमा ६–६ स्वर्णका लागि प्रतिस्पर्धा हुने संघका सदस्यसमेत रहेका नोर्भु लामाले जानकारी गराए ।
प्रतियोगिताको विजेताले १ लाख रुपैया पाउनेछछन् । दोस्रो हुनेले ५० हजार रुपैया, मेडल र प्रमाणपत्र प्राप्त गर्ने आयोजकले जनाएको छ ।
प्रतियोगिताको महिला तथा पुरुष उत्कृष्ट खेलाडीले समान १०–१० हजार पाउनेछ । यस्तै प्रतियोगितामा सहभागिता जनाएका खेलाडीको १ वर्षको स्वास्थ्य बीमा गरिएको आयोजकले जनाएको छ ।
एभरेस्ट वल्ड क्लासले यसअघि सन् २०२० मा आमन्त्रण तेक्वान्दो तथा अर्काे संस्करण नेपालमा हुने जानकारी गराएको छ ।
प्रतियोगितामा लाग्ने खर्च मुख्य कार्यालयबाट र प्रायोजकबाट पुर्ति गरिने आयोजकले जनाएको छ ।
